سلام يااهل المحل اللي تجيه الضيوف= احدن على الرجل يمشي واحد فوق الركاب
وانا لفيته ولا دونه تحول الظروف= حيث ان راع الكرم ماصك للضيف باب

يامرحبا رحب وافي مثل بيض السيوف= بين الرجال الوفيه ياعزيز الجناب
ان كان وانك مثل مستور زدنا الصفوف= وان كان ماانته بمثله لك طعام وشراب

الك البقا والكتاب نشوف فيه الحروف= واللي تعلم يبا يقرا حروف الكتاب
مستور وافي وانا من ناس ماهم ضعوف= اوزن كلامك وحاسب زين ياابو الشباب

اتشيل لك في كتاب وظنتي ماتشوف= تشيلها فالذهاب تجيبها فاالاياب
ياكبر راس الجمل ياصغر راس الخروف= واللي يشيل الحراب يذوق نغز الحراب

المعمعه ماهي بضحكه وهزة كتوف= والرجل مايلبس الا قده من الثياب
حنا ندوس الخطر ماهمنا فالصدوف= طرد الحقيقه ماهو يالذيب مثل السراب

انته تعلم رجال ماتهاب الحتوف= واللي يريد العذاب نبشره بالعذاب
مانته بشوق الهنوف اللي تحن الكفوف= ياللي تشيل الحشف رد الحشف فالجراب

ياراعي الصدق ولد الذيب دايم يحوف= يدور الرزق مابين السهل والشعاب
انا زعيم الهنوف وقلبها لي عطوف= لكن خل عنك العلوم وخل عنك العتاب

ماهو بلاقي عشا عندي لو انه يطوف= المنطقه محتميها ماتجيها الذياب
انته من اهل البلد لكن ماانت معروف= لكن رح للقصير واخبره لاتهاب