ياراعي الصدق ولم طبختك والكيف فنجال=وليا تقهويت هات السالفة والعلم أمانه
نبا السوالف رفيعة والمعرفة مكسب رجال=ونشوم عن درب فيه من العبش بعض اللعانه

حياك ربي على الجزله وجيب اللي على البال= انته وانا من رجال الطيب واصحاب الديانه
ماني سواة الضعيف اللي ليا حدوه بالجال= يظهر حصيله ويعلج هرجته مثل اللبانه

من لا يعرف النقد لا تطلبه حصة ومعدال=خله بدبره وخلك حرص من قوم الخيانه
الرجل لا جاك عقله ناقص ماهو برجال=العقل نعمة من الله والشكالة بالرزانه

من لايعرف النقاده قول فال الله ولافال= الله بلانا بهندي يرطن وكله رطانه
بعض الرجال احسن انه فوق وجهه يلبس الشال= يقعد مع اهل الجسوم الناعمه واهل الليانه

قت البعير العماني وإن ندر بالحال بالحال=إنحره والله يعوض بالحصان وبالحصانه
الدعوة اللي تنقد عم والا تزعل الخال=أخيه منها تجنبها وخله في جنانه

حرجت فوقه وجا سعره مع الدلال بريال= لكن قبل انحره لازم يذوق الخيزرانه
ام الخلا فالخلا تومي بمطواحه وخلخال= الوجه فاهي وريحتها تعجعج بالصنانه

بيعه بكلب سرق لا ترتجي من مثله عيال=ترى حلال يغث الكبد للعاقل مهانه
الذرب يحفظ لسانه والردي يربط بسلسال=ارفع عنه ياوسيع المعرفة حق الحصانه

ماترتجى نبتة العنصيل لونبتت بمسيال= نبته خبيثه وريحتها ترى ماهي بزانه
هذا كلام العقل والعقل للرجال مثقال= لكن حنا بلشنا في رضا حانه ومانه

الناس فيهم جهل لكن بالأجواد عقال=هذي طبيعة ببعض الناس ما تكب الشطانه
ياصاحبي يارفيقي لا تعاين فعل جهال=كل واحد ياطويل العمر معروف مكانه