قال الفقر قلت الفقر ما يعيبي = العيب عند مضيع(ن) كل الاحساس
ياكم فقير(ن) للمعالي مصيبي = في كل مضمار(ن) كسب كل نوماس
قبل هلا يضحك حجاج(ن) لبيبي = والنار شبت واحضر البن ومحماس
والجود بالموجود ماهو غريبي = هذا مثل مقيول من خلقوا الناس
والمرجله تحضر ومره تغيبي = مقيول دوس الراس من قبل ينداس
ومضيع الاحساس مابه طبيبي = لو به مرض ما كان لاموله الناس
هذا سوال موجه لمن يجيبي = ماهو مجرد حبر من فوق قرطاس
نبا جوابه قبل قافي يشيبي = بحبال تارد ما نبا احبال الامراس
فكر يابو فكر(ن) يسمى رهيبي = هات الجواب وتأخذ الدرع والكأس
وأختامها يالله جزل النصيبي = ترحم عبادك يوم قطعات الانفاس