يا هاجسي سج في ليلي وقلبي دليل=هات العلوم المفيدة يا أحمر العين هات
اجزل لروحي عطاك ولا تجيب الهزيل=وأنته خبرتك نبيه ولا يبا لك وصاة(ت)
وإن كان عزت عليك الطيبة يا الأصيل=صح الحلوم القديمة من طويل السبات
الليل يا طول ساعته وقلبي عليل=كن الحشا فيه نيرة بالهوى موقدات
وكن العيون إندلق في جوفها زنجبيل=والقلب يرزم رزيم الوبلة الفاقدات
الليل كله على المتكى بليا خليل=أصدر لفكرة وفكرة على التو جات
اسهر واذكر لروحي بالزمان الجميل=واصبر الخاطر المكسور بالمقبلات
عل الليالي تجمل قبل يوم الرحيل=أقضي مع الولف ليلة وأقهر المترفات
ما دام ما له بذا الدنيا بقلبي بديل=القلب ماله خيار إلا الرضا والسكات
ياقلب مادام تنبض اقتنع بالقليل=اقتات باللي كتبه الله لين الممات
لو كان مابه على رب البشر مستحيل=قادر يلم القلوب الموجعة بالشتات
وانا يقيني بجود الله ما هو بخيل=قادر يعوض علينا كل ما كان فات
وإن صار هذا ياقلبي بالزمان القبيل=بعد السهر بالليالي تهتني بالمبات
ما عاد والله تشكي في لياليك ويل=تنسى جميع الهموم اللي جرت بالحياة(ت)
هذي اماني فؤادي كل ما امساه ليل=ما بين حلم جديد وماضي الذكريات
العز مطلب لروحي لو حظي ذليل=ماني مطاوعه نفسي شفها المثمنات
اسهر واسهر عيوني بالقصيد الجزيل=اقضي لساعات ليلي بأحسن الأمنيات
وليا شعرت بتعب في حضن ليلٍ(ن)طويل=رميت كل المتاعب في سجود الصلاة(ت)
أطلب لجود الكريم اللي ثوابه جزيل=يرحم لضعفي وقلة حيلتي بالسواة(ت)
والله وكيلي على حظي ونعم الوكيل=مالي عنه من ملاذ ولا بغيره غناة(ت)
يا هاجسي سج في ليلي وقلبي دليل=هات العلوم المفيدة يا أحمر العين هات