الا ياالله يامنزل تبارك والفلق والصف= ايات (ن) للملا تتلى جعلها الله متليه
طلبتك وانت رجوى دعوتي يا الواحد المنصف= رفعت الك اليدين ولا لغيرك ارفع يديه
ولا غيرك اله نسأله ياربنا تلطف= حنينا روسنا هيبه لقدرتك الالهيه
اسالك تنصر الاسلام واللي فالعرب مضعف= وتنقذ امة الاسلام من ظلم اليهوديه
سلام الله سلام (ن) من حنايا القلب لاهل العرف= عدد مالاح براق الحيا من غر منشيه
سلام(ن) من بنوك العز واهل العرف يصرف صرف= ويدخل في بنوك الطيب امام الناس جهريه
الا يالجنة التحكيم جاكم علم داخل ظرف= ومضمونه من الواقع ويحكي قصة بنيه
بنيه عمرها عمر الزهور ووضعها مؤسف= لها قصه غريبه محزنه ماهي غراميه
غصبها نذل وضعه بالردىيااصحابنا مقرف=بلا ملك وثمين احتلها لا رحم ابو حيه
نزع منها شرفها والكرامه داسها بالخف= نذل مايعرف الرحمه ولا فالقلب ماويه
نختني من بعيد الدار وانافي نحا مطرف= وتكدر خاطري منها وصحيت النياميه
كسر قلبي نخاها يوم تنخا دمعها يذرف= ضعيفه مالها جدوى وانا عندي شهاميه
نزعت عمامتي من فوق راسي مثل من يختف=نخاها هز وجداني وابفزع دون نشميه
ماحد يرضى الاهانه فوق عاره والردى والسرف= ومن يرضى المذله للمعوره جعله الحيه
نشدت البنت قالت يعربيه بعد جهد وكلف= وقالت خبر اهلي عندكم والنيه النيه
وقلت الاسم يابنت العرب هاتيه لاجل اعرف= وقالت لي ترى اسمي عده حروف(ن) رباعيه
ترى اولها بحرف الغين والثاني بزا واعطف= وثالثها بحرف الزاي ثم الها ء منهيه
وجمعت الها الحروف وجا اسمها مضبوط علم الصرف= واثرها غزه ابنة من لها خمسين حوليه
وانا منها حزين وكن في قلبي مضارب شلف= حزن من بنتنا اللي دنستها يدين عبريه
وقلت الها ابشري لكن بشرايه سواة الوقف=انا خابر بلانا فالامر مافيه حزميه
ترى ام البنت راحت قبلها تقرع سواة الجف=نشف دم الحبيبه واصبحت هيكل وعظميه
لكن اببذل المجهود واشيع الخبر وازف= عسى صوتي يصحيهم ويجعل روحهم حيه
الا وابنتنا راحت خلاخلها الجميله نتف= وحنا ياالعرب نصفق بيمنانا الشماليه
ترى مايرتضي ذل المهونه غير عير الخسف=يراوح في مكانه والنذول تعرقي الكيه
الا ياشعب يعرب بنتكم راحت سواة العصف= عصفها عاصف العاصوف بعد العز والريه
الا ياشعب يعرب كل شخص(ن) منكم مكلف= يشد العزم بالهمه ويعقد صافي النيه
على غزه من الظلم اليهودي مايفوق الوصف=تحت ظلم اليهودي راضخه للظلم جبريه
جنود الاحتلال مركزين اهدافهم بالقصف=تعاقب فوقها غارات بريه وجويه
على حكم التعسف والقهر يمشي نظام العسف=غزوها واستباحوها وشبوا فوقها الضيه
غزاها الغاشم الملعون مدفاعه يلفه لف=على البنت الابيه ماسكه فالخط دوريه
مبانيها الشوامخ والمساجد هدمت بالنسف= صواريخ العدو زرفات صبحيه وعصريه
مناظر محزنه تجعل وسيع البال يرجع صلف= من التجويع والترويع زايد كبت حريه
ضحايا بالالوف اللي على يدهم يناله حتف=دمي الابريا فوق التراب تقول سيليه
مجازر مذبحه والدم ياللهول ينزف نزف=نسا واطفال وشيوخ(ن) غدوا للمجرم ضحيه
تعاورهم سهوم الموت ورياحه بهم تعصف=وحاله مزريه بالحيل والاوضاع مرثيه
وبنت الدينين سلاحها كومة حجر بالحذف=حصيلتها مع الاوغاد دشداشه وصدريه
وحنا يالعرب فالموقف الحساس نقرع دف=كرامتنا غدت فالسوق مبيوعه ومشريه
تفكك وانحلال ولاش فالميقاف وحدة صف= وهذي دعوة(ن) صابت هل الاسلام مدعيه
نيام (ن) فوق اسره فارهه نضحك من الموقف=ضعف ايماننا بالله والنيات ملويه
ماغير اعلامنا يزبد تقول انه مصاب بخرف=وقول بلا فعل ياناس والاخبار كميه
وحنا يالعرب مليار والا زاد فوق النصف= عجزنا لا نحررها بشيعتنا وسنيه
غثاء كغثاء السيل وضع(ن) ماهو مشرف= نحب الفانيه والحق مانبغاه موليه
وهذا الوهن فينا دب لو كان العرب تعرف= حديث المصطفى الصادق تصدر به بخاريه
وغزه صامده يارب يارب الملا تخلف= عليها بالفرج ويدين رب البيت ممليه
صمودك بالعزيمه ترجف العدوان منها رجف= على هالتقنيات ازرى اليهودي لابعث حيه
يقاوم هالصمود اللي نشف ريق اليهودي نشف= وهذا اكبر دليل ان الرجال قلوبهم حيه
لاشك الابتلاء يدفع امام ولا حشا ينكف= ومع هذا لانستسلم دروب العز ممشيه
شباب المسلمين اهل الكرامه شف كل الشف= كرامتهم ثمن للعز مايوجد ثمن زيه
سياده مع رياده ترفع الهامات وايا الطرف= لها فردوس فالدنيا وفردوس(ن) بعليه
الا وان الفنا فالحق يجمع دائرات الالف= وهو عين البقا قاله حسن وسط الطحاويه
وعلى التقصير هل الدمع ياللي دوم تتحسف= ولاتبكي شهيد (ن) عند ربه روحه الحيه
ذريعتهم خديعه للعرب مفهومة(ن) بالحرف=وتبرير الخيانه والغدر باعذار وهميه
نظام الظلم لاسرائيل مايعرف نظام العرف= قوانين اليهودي كلها عوجا وسلبيه

يالله اني طالبك يارب كل العالمين ..=انت وحدك تفرج الضيقات يالفرد السميع !!
من دعاك اجبتله دعواه ..يارحم راحمين=يالهي يا أرحم من الام .. بالطفل الوديع !!
يالهي بلغت الحلقوم ولا إهنا يدين ..=يالهي بلغت الحلقوم والموقف .. فضيع !!
في فلسطين الجريحة علوج الغاشمين ..=تنهب أرض .. وتهتك أعراض .. أحسننا صنيع !!؟؟
وينكم حكامنا ؟؟وين العروبة ؟؟ وين وين ؟؟=وين دينن من رفع رايات عزة مايضيع !!
صح مانملك سلاح بحجم ملك الكافرين ..=لكن ..وربي معانا ديننا ( الحصن المنيع ) !!
شوفوا أطفال الحجارة وسط غزة صامدين ..=دون كهرب دون مشرب..دون مشرى دون بيع !!
عارفين ان الفرج قادم وبالله واثقين ..=ومؤمنين ان مابعد حر وقحط غير الربيع !!
طفل ياقف قدم دبابه ولا حسّب سنين ..=معه مقلاع وحصاة .. وداخله قلبن شجيع !!
واليهودي يوم شاف استنجد وسوى كمين ..=خاف وضايق به من الخوف هالكون الوسيع !!
قال ابي دورية زيادة معاها محاربين ..=من رداهم مايعرفون الهجوم الا جميع !!
هذا طفل ولخبط حساباتهم هالمجرمين ..=كيف عاد رجالنا لالبوا بصوتن رفيع !!
الله اكبر الله اكبر .. ويلكم يالمعتدين ..=الله اكبر الله اكبر .. طعت والا ماتطيع !!
الله اكبر والله اكبر صامدين وصابرين ..=الله اكبر الله اكبر .. نبذل اللي نستطيع !!
الله اكبر الله اكبر .. يالطغاة الحاقدين ..=الله اكبر الله اكبر .. والمنايا ماتريع !!
رمزهم وشعارهم ..(دون الوطن مستشهدين )=وان هجم واحد كأنه ذيب هاجمله قطيع !!
اليهود يفكرون ان نصرهم دايم مبين ..=واهل غزة رجعوهم معهم الذل الذريع !!
وقبل لاختم اسمعوني .. باقين لي كلمتين ..=كلميتينن بالحنايا لها صوت وقريع !!
ليه ماحنا جسد واحد وحنا مسلمين ..=ليه مانفرح جميع وليه مانبكي جميع !!
مسلمين بنشرة اخبار الصباح معيدين ..=وثاني الاخبار استشهد كهل وام ورضيع !!
ويالهي ..يالهي ..ياالقوي وياالمعين ..=استجب دعوات من يرجون لطفك ياسميع !!

الشعر مايكتب على غير مضمون=وشعر بلا مضمون يحسب خساره
ياكم واحد يكتب الشعر مفتون=وياكم واحد قام يمدح دياره
وياكم واحد يكتب الشعر مديون=وياكم واحد لجل فن وشطاره
وانا كتبته لجل عذرا على شون=تصيح في ليله وتنخى نهاره
عذراَ تضم الظيم وبليس ملعون=وترى الحريقة تبتدي من شراره
عذراً يتيمه مالها قلب وعيون=ولها قدم مكسور ماله جباره
ونتم ضمايركم على الغبن والهون=والقدس مايعمر وزايد دماره
محد(ن) على سنة نبية وقانون=يستر على العذرا ويضفي ستاره
واخوانكم في القدس تبحث عن العون=ونتم مع اهل العولمة و الحضاره
شبابكم ورى الحضارات يسعون=وشيابكم يسعون لجل التجارة
يا أمة الاسلام بالحق تدرون=لازم يموت الكفر وتزيل ناره
على العدو نقبل وحذرى تقفون=نصمد ونرسل غارة بعد غاره
وين الرجال اللي ركوع يصلون=وين الشجاعة و السطر و النعاره
وين الرجال اللي على الحق يمشون=متى يبين الحق يجنا ثماره
وين الرجال اللي على الدين يبقون=كفو عن خدود اليتيمة عباره
افواجنا مليون مليون مليون=وقلوبنا ياحيف تسعى مراره
يالله يامعبود ياخالق الكون=ياواحد كل البشر في قراره
سبحانة اللي بأمره الكاف و النون=طالبك في يوم(ن)صعيب(ن)فراره
وختامها اعداد ماباح مكنون=وعداد ماحجوا وراحوا زياره
وصلو على المختار يلي تقدون=على نبي(ن) زايد(ن) في وقاره

نادت بصوت للفداء رمز وشعار=يُسمع صداها مع مرور السنيني
صيحة شجاع فالمهمات مغوار=الموت دون ارضي وعرضي وديني
ستين عام جراحها دم قطار=تنخا العرب وتقول يا مسلميني
هذا العدو جانا لتعبيد الأحرار=والحر في وقت الشدايد يبيني
اصمد وأنا غزه على حرب الأشرار=ولغير ربي ما حنيت الجبيني
اقبل عدو الله معه جيش جرار=في كبرياه وقوتـــــــــــــه مقبليني
الأرض ترجف والسما تمطر النار=والطائــــــــرات إلها ازيز وحنيني
وجنائز ترمى عن يمين ويسار=وعلوج من بين البشر جايلـــــــــــيني
حتى طمع بالنصر ويدمر الدار=والنصر للمسلم وربي يعـــــــــيني
جوه البواسل ما يهابون الأخطار=ملبوسهم ثوب الكــــــــفن لابسيني
سم العداء في ساعة الملح لا اثار=لاجاله بسمع الاذا ني رنيني
كتائب القسام وطوال الاشبار =وحمـــاس عنوان لفدا الغانميني
حماية الماقف بعيدين الانظا ر =مطلبهم الجــــــــــنه لها طالبيني
يتلون عمى والتكاثر بالاسحار=أحفاد لاصحا ب الـــنبي الاميني
وشنوا صواريخ لها ضرب بتار=قسام وا حد مــــرعب المعتديني
من وسط غزه ينطلق صوب وعيار=وفي عسقلان يشيب منه الجنيني
قضوا حصون الكفر دارٍ بعد دار=والصافرات تدق في كل حيني
وبدت جيوش الكفر بالفعل تنهار=تبحث عن المخـــــرج يسار ويميني
عشرين يوم اسقوهم بكاس الامرار=جو يكسبون وعودوا خاسريني
ياأمة المليار وش دور مليار =والقدس أسير بقبضة الغاصبيني
من دون بابه شيدوا حدب الأسوار=وحنا ورى د نيا الشقا لا هثيني
وأخوانا ما بين تشريد وحصار=ودموع تذرفها عيون الحزيني
إما نموت جهاد عزة ولاالعار=وإلا نعيش العمر متخاذليني

ستـيـن عـام(ن) راسـيـه كالجبالـي = مـاهـزهـا الزلـزال وكثر البراكـيـن
عـدوهـا مـن صـمـدهـا صـار بـالـي = عـجـزان يقطـف وردة مـن البساتـيـن
صـمـودهــا يــفــوق كـل إحـتـمـالـي = مـتـحـمـلـه الـشـيـن وبالـغصب ستـيـن
صـمـودهـا وقـف زحـوف الـرمـالـي = مـثـل الشجر ثـابـت بوجه العصارين
بـنـت(ن) عـفـيـفـه اعتلت فالعلالي = شموخها كـنـه شـمـوخ السلاطـيـن
صـــلاح دلـلـهـا بــكــل الـــدلالـــي = حـتـى غـدت قــدوه لـكـل المزايين
فـيـهـا جـمـال يـفـوق كـل الـجـمـالي = جـمـالـهـا يـسـوى كـنـوز الملايين
لـكـن مـال الـوقـت بـالـبـنـت مــالـي = هبت عواصف طيحت شجرة التين
اطـفـالـهـا شـجـعـان مـثـل الـرجـالـي = مـن دونـهـا تـدفـع بدم الـشـرايـيـن
سـلاحـهـم احـجـار وسـط الـنـبــالــي = وقـف عـدو الله حـزب الشياطين
طـلـت عـلـى الـعـربـان مـثـل الهلالي = من عقب كانت بدر يضوي ميادين
قـالوا وش اللي صـاب بـنـت الحلالي = لكن صافي نهرها عـكـره طين
فـزوا لــهــا فــزة ذيــاب اللـيـــالــي = حـنـا مـعـك يـابنت بالعسر واللين
يقودهم ملك عزيز(ن) وغالي = صقر العروبه صقر كل الميامين
بـجـنـاحـه الـطـاهـر يـشـيـل الـثـقـالـي = لـجـل الـكرامـه والعروبه مع الدين
فـعـلـه يـحـول كـل مـر(ن) لـحـالـي = من شانها والله ما غمض العين
يـحـكـم بـشـرع الله عـلـى كل حـالـي = الـعـدل والـسـنـه عـنـده عناوين
ابـو الـعـرب وكـل الـعـرب لـه عيالـي = حنا سيوف الصقر بيسار ويمين
ثـلاثـة(ن) مـاعـنـهـا الـصقر ســالـي = مـكـه وطـيـبـه ثـم تأتي فلسطين
يــالله يـــامــعـبــود يــاخـــيــر والـــي = تغفر لنا في يوم عرض الموازين

على صوت الرضيع اللي يصيح وينتخي بامه =بعد ما مات ابوه اللي رحل من ضربة العدوان
تزايدبه معــــاناته ويمســـح دمعــه بكمه=يعاني قلة الحيله وعايش لو عة الحرمان
يبا ياسف على حــاله ويرثي حالة الأمه=ويبا ينتابه شعور الغضب في ساحه الميدان
طفل غزه رغم كل المصاعب عالي الهمه=تجددبه مطاليبه على مهره وبنت حصان
ترعرع في ثراها والكتاب اللي نزل صمه=حفظ اياته بعز الولي واصبح فصيح لسان
باسم غزه تقدم لجلها وايامها تزمه=على كف القدر من اجل ما يرجع وهو خسران
عسى يكبر ويحمـيها من اللي سافكن دمه=ويبقى شامخٍ بنيانها لاهل الوفا عنوان
تولتها بني صهيون شله مالها ذمه=شراذم جابها بلفـور و امست برضها سكان
نناشد من يصلي فرضه المكتوب ويتمه=يساهم من اجل غزه ويكسر حاجز الكتمان
نعم غزه لها كل العرب بالصوت ملتمه=تقول القصر مايثبت على عزه بلا سيسان
نعم غزه عليها من تصاريف الكفر غمه=تحرى بدرها يظهر وانا اقول البدر ما بان
نعم غزه هواها يحمل البارود ويشمه=مدافيع الكفر تضرب وصار خيالها دخان
نعم غزه عرفناها تمد الحزن وتضمه=لان الحزن مايمحي مواجيعه سوى النسيان
على هذا قويه صامده والوقعه مطمه=تبي تاقف بوجه المعتدي والغازي الطمعان
لجل تشرب وتروي حالها وتغوص للجمه=وتكسب عز اهاليها وتقطف وردة البستان
ولدها يحتري وقت اللقا فزعة ولد عمه=لان العرق يجمعنا ودين الله جعلنا اخوان
على هذا لا بد انا نشيل الهم من همه=ونفتحله بوسط الصدر لامن جالنا بيبان
عروبتنا تعلت بالوفا في عالي القمه=من عصور قديمه نسلها شجعان من شجعان
نوحد صفنا وعقولنا ماتسمع النمه=لجل ما يفرح الطامع ونسحب راية الخذلان
مدام الاسم يجمعنا يموت الداب في سمه=ويبقى مجدنا بأسم العروبه شامخ البنيان

يا عظيم الشان وأنت اللي تعرف الخافي=رحمتك ورضاك للمسلم مناه وشفه
أطمع بجودك كثير ومن غضبك أخافي=الذنوب جبال لكن العمل يا خفه
جيت في هذا الحياة بدون شيء وحافي=ولا وعيت ألا وأنا لابس ثياب الدفه
واحمد الله فيك يا دنيا لباسي ضافي=والنهاية طالبك يا رب سترك ضفه
ما نويت أسوق رجلي وبدي المشرافي=وأتهيض وأنثر إحساسي وجي وصفه
من تحت حدب الضلوع العوج يصرخ قافي=والمشاعر تنقله للمستمع وتزفه
الهموم أمواج لكن الصدر مضيافي=مقبلات ومقفيه من ضفه إلى ضفه
كني المسجون والصمت الرهيب كتافي=يوم أشوف الدمع ينزل واليتيم يكفه
فيك يا غزة من أنواع العذاب أصنافي=الزمن ياطا على المستضعفين بخفه
من وعد بلفور فيهم يحذف الحذافي=يولد المولود وأنواع الحجر في كفه
الفراش الغام والجو مكتسي بلحافي=القنابل فوق أهل غزه وفوق الضفه
ما لهم غير الدعاء المأثور الا يا كافي=والعرب تلهو وشوف أعناقهم ملتفه
للحياة الفانيه والجو ماهو صافي=رايهم هوج الرياح العاتيات تلفه
لنهم بضعة شعب حنابله وأحنافي=من رسب منهم رسب والبعض فوق الحفه
وكان تبغون الحقيقه والجواب الشافي=كل مسلم يحسن النية ويعدل صفه
ما تحرر دام بين المسلمين خلافي=والنوايا ما توصل دام فيها لفه
غير بالتكبير وسيوف(ن)حداد رهافي=في يدين المخلصين مرجحين الكفه
يا صلاح الدين والفعل العظيم يشافي=طير حر يحوم بجناح السعد ويرفه
يا عمر ثاني خليفة خيرة الأسلافي=أنت رمز المجد للأمة و رمز العفه
الأمل موجود والتحرير ضمن أهدافي=لو يطول الوقت والصفه بعدها صفه
والصلاة مع السلام المعتبر والوافي=للرسول الهاشمي وكرره وزفه

من للحمامة في عقر دار أهلها =اللي لها مدة بثوب ألحدادي
في كل يوم يحيل منها زملها =والغرب غنت واصلي يا بلادي
عن حالها مافية واحد سألها =من هو يلبسها ثيابن جدادي
جنحانها غرقا وزايد بللها =كلن يرفرف في سماه أنفرادي
حسبي على اللي عن بعضها عزلها =حتى تحكم للبطان القيادي
قصة يباري جدها في هزلها =ابطت حديث المجتمع والنوادي
والشرق ما وقف دقيقة قبلها =ما فاد وين اللي يضد الاعادي
والأرض ما ينبت بها غير أثلها =منه الغصون اتميل في كل وادي
ما عاد يهنى بالضعن من نزلها =هبت شمالية وهب البرادي
والنمل ثور فالخلية نحلها =والجو هادي لي متى الجو هادي
بطولة الستين غايب بطلها =مدري متى نلقاه في الشرق بادي
ياسم لنا الفاطر ويعقل جملها = وترجع معة سلت سيوف الهنادي
باللفور يقصد والمعاني فتلها =ولحدن نقض فتله وحط الشدادي
وصفوفنا من هو يعدل خللها =ويهب ريح المجد عنبر وكادي
عمله قديمة وين نصرف هللها =دولارها في كل الاحوال سادي
الله بيوم مثل بدر يغسلها =والعلج يلقي يوم ماهو بعادي
هي أمة الاسلام فالله أملها =يقدر يسلطاها على كل غادي
وحده يعالجها ويشفي شللها =وعيونا ترمي عميق الرقادي
وترجع لنا الامجادي فزكى حللها =ونشوفها قدام نقل الروادي
وزروعنا لا بد يثمر نخلها =ولا بد يطلع من ثمرنا المفادي

الاوله يالله يارب العباد الساجدين=اللي اليا صلت لوجهك خاشعه في سجودها
ياخالق الانسان ياسامع دعادة المدعين=ارحم عبادك يالهي وفها مقصودها
ياللي خلقت ابونا ادم قبلنا من شيء طين=حددت له روحه متى وقت اللقا موعودها
افرج لاهل غزه يالهي من طغاة معتدين=اللي على اطفال غزه حاشدات حشودها
يالله نطلبك النصر يامسند للصابرين=انت الذي تعلم خفاياها بجوف سدودها
يامة الاسلام ذا شي يروع الغافلين=وش ذنب ام مرضعه يوم افقدت مولودها
تلقاه بعد ايام وهو من سبايبهم طحين=وهي على ماصار تلطم بالكفوف خدودها
الموقف اللي في هذاك الطفل يبكي كل عين=يوم الدموع من العيون الساهرات شهودها
البارحه قلبي على ماشاف فالشاشه حزين=يوم المدافع فوق غزه كاثرن بارودها
وهم على روس العدا يد وحده متكاتفين=يفجرون الشله اللي خاسرات جنودها
يابطال غزه لايخوفكم كلام المجرمين=انتم هل الوقفات في وجه العدا وصمودها
وهم ورى الجدران رغم سلاحهم متخوفين=من خوف موت يدخل الرجال جوف لحودها
الله اللي ثبتكم بكلمة حق فوق الظالمين=وتطهرون ديار غزه مع جميع حدودها
وش ذنب اهل غزه تحاصر من سلاح الكافرين=واليا انكرت كل الدول قال ماعاد يعودها
ناس تقتلهم وناس بالسجون معذبين=وحنا ورى بث الجزيره نقصها من زودها
اليا متى واطفال غزه بالسلاح محاصرين=تيسر بها العذرا ويقتل بالقنابل عودها
يامة محمد نبي غزوه كما غزوة حنين=يبين جبان اليهود وينهزم شرودها
نهجم عليهم في نصيف الليل وهم نايمين=نشفي صدور من زمنها يابسات كبودها
العبد ماله غير شي ينكتب له في الجبين=محدده نفس الابن ادم ماتزل حدودها
وختامها يالله نطلبك النصر للمسلمين=على يهودن مع فلسطين تخون عهودها

اخص ابها اهل غزة وهم فيها ولا يسمح لهم فيها ولا يسمع لهم فيها=
ولا يسمح ولو نادوا يبون الزاد=
ولو عانوا الم يزداد=
من الاصفاد من الاصفاد من الاصفاد =
ولا يسمح لهم فيها =
ولا يسمع لهم فيها=
قبل نور الفجر يطلع =
قبل صوت الندا يسمع=
ضياء النار مشرق في سما أرض البتول أجمع=
طلع صوت القنابل واللغم وأصوات للمدفع=
ولا يسمح لهم فيها=
ولا يسمع لهم فيها=
بنو صهيون تولوها وهانوها=
مساجد غزه هدوها=
مدارسها مبانيها وكم مستشفى دكوها=
وبسلاح الدمار الشامل الممنوع غطوها=
وهم فيها لهم يسمح=
وهم فيها لهم يسمح=
ولا رحمة لمن يشكي=
مناظر كلها تحكي=
كقتل الداعية ياسين وهو مقعد على الكرسي=
وقتل محمد الدرة في لحظة رعب وهو يبكي=
وهم فيها لهم يسمح=
وهم فيها لهم يسمح=
على أرض الدين والعزة=
توالت كم وكم هزة=
وشوهد منظر الفسفور يساقط على غزة=
بشر يفنا شجر يفنا طيور تموت في كل ساعة وكل حزة=
ولا يسمع لهم فيها ولا يسمح لهم فيها=
سيول من الدماء تسفك=
محارم كلها تنهك=
وابن غزة قليل الإقتدار سلاح ما يملك=
يعيش بخوف في داره بعد عنا من أقداره يدور للأمل مسلك=
ولا يسمع لهم فيها =
ولا يسمح لهم فيها=
فلكن قاوموا الأبطال=
فلكن قاوا الأبطال=
بهمتهم شالوا حمل من ثقله يهد جبال=
وقاموا وأعلنوا وقفة صمود تجدد الأمال=
عسى يسمح لهم فيها=
عسى يسمح لهم فيها=
بعزم الدين والهمة=
وحزم يبدد الغمة=
وقف كل شخص منهم فالوغا ينصر ولد عمه=
عهد واحد وطن واحد رجل واحد وقف للموت ماهمه=
عسى يسمح لهم فيها=
عسى يسمح لهم فيها=
قدر ما تاح له إمكان=
صنع من زاهد الأثمان=
صنع الغام صنع صاروخ شديد إحكام يزلزل مسرح الميدان=
في وجه المعتدين الغاصبين يثور كالبركان=
عسى يسمح لهم فيها=
عسى يسمح لهم فيها=
مع هذا وقف محتار =
يعاني من صدود الجار=
وايت جار جار أمة نهجها الدين القويم ومصطفاها سيد الأخيار=
الآ تعلم ألا تفهم ألا تدرك حقوق الجار والله عار والله عار=
عسى يسمح لهم فيها=
عسى يسمح لهم فيها=
صمود صدق نهار وليل=
وللعدوان يزيد الكيل=
ألا يامن لك لتكبير والتهليل ألا يا منقذ البيت الحرام من أبرهة والفيل=
تأزرهم تساعدهم تناصرهم وتهزم زمرة إسرائيل=
ستنتصرين يا غزة=
ستنتصرين يا غزة=

خيم على عالم عربنا ليل في وسط النهار=شوف العرب تمسي وتصبح تحت حلكة ظلمته
ظلمه يشيب إلها الولد قبل تشيب إلها الكبار=لو كان شيب الراس باقي ما وصل لا حزته
من شي شافه شوف عين وظلم جا فوقه جهار=ملا النواظر بالقهر غصبا وهلت دمعته
دمعة حزن دمعة الم دمعة غبن دمعة مرار=العايلة ماتت وضاقت به وزايد حرته
انه وقف مكتوف الأيدي لاش نار ولا عمار=صفر اليدين وزمرة الطاغوت حيله هدته
وقفت عجز وقفت تعب وقفة قليل الإقتدار=اسهوم عدوانه مثل وبل السحايب غطته
غطا عليه ظلال للبارود تغطات الغبار=يوم اقبل اعصاره وصلفات الهبايب هبته
اغضا وعود بالنظر للدار واليا ماش دار=ما فاق من هزاته الأولى وزادت هزته
هزه تروح الها العظام الصم لو قسيت كسار=والقرم من تاثيرها تعبان طاحت همته
صوت اللغم صوت المدافع غير صوت الإنفجار=من كل صوب وكل جانب جت مصيبه حدته
والمشكله إن العدا تجري عليه الإختبار=بسلاح كل الناس فالعالم وعت مضرته
مضرة(ن)عظما سبايبها من سلاح الدمار=والمعتدين بدون رحمة فالقنابل عبته
تقصف به الأرض العزيزة والكبار مع الصغار=الطايرات بلا تردد جات صبح وهلته
على أرض غزة كل أنف ذكر قلته جد صار=صهيون سوا كل حاجة والعرب ما همته
شاف العجايب هالولد ومل كثر الإنتظار=يصرخ بعال الصوت لكن من يجاوب صرخته
لا ما ولا عنده دوا لا أكل عايش بالحصار=اللي فرضه الخصم فوقه لين عانا شدته
شدة لها صدر البطل بالعزم والحزم استثار=بالدم يفدا كل شبر ولا يغادر درته
جمع شتاته استعاد الفكر بالله إستجار=النصر وإلا دون غزة مات شهم بعزته
بعزم نفس وعال حس اصر جاب الابتكار=قاوم ولو كل المعاضل جايرات وصدته
صنع سلاحه واستعد وكنه البركان ثار=في وجه عدوانه ونفذ بالبصيره خطته
خطه رسمها بالذكا وبحسب مفهوم الديار=زرع عتاده في مناطقها وحكم ضربته
اطلق صواريخه وشب النار من صغر الشرار=بفكره اللي مستنير ومن دهاه وحنكته
حقق صموده يوم غار وفي عروقه دم حار=بالله اكبر مع ضعيف سلاح زادت قوته
لوان تملك صدره الحسرة بعد ما الجار جار=واخوه في وسط البلد قفا عنه في محنته
الدين فالمله وتشريعه حفظ حق الجوار=واليوم الأمه صامته والصدر فاض بحسرته
وصدورنا فاضت غضب حنا على الأمه نغار=والمسلم المؤمن على دينه يغار وامته
يا أمة الإسلام يا هل الدين يا صحاب الوقار=متى متى تصدق مشاعرنا نقوم لنصرته
نصرة هل التوحيد سادات اوغا والانتصار=وجه الله اللي مبتغى والجايزه هي جنته
القدس راح وبعده الضفه وزاد العار عار=قطاع غزه اليهود الغاصبين احتلته
وباقي على عالم عربنا ليل في وسط النهار=شوف العرب تمسي وتصبح تحت حلكة ظلمته

تم التصويت . .

وماقصرتوا في القصيد .. كان وافي ومن وافين

واتمنى التوفيق للجميــع

واتمنى الجميع الفوز .. وان كانت مستحيله ..


تحيآتي وخآاالص ودي