جاتني بنت الشيوخ اللي تسابقها المزايا=كنها بدر الدجى نص الشهر في ليل صافي
سلمت واستسلم الخفاق من خلف الحنايا=قلت مرحب اقلطي بالقلب والمرباع دافي
ما فتحت أبواب قلبي قبل شوفك للصبايا=عرش قلبي ما رقا به غير حبك والقوافي
ربعي بالقلب وعيوني لمرباعك مرايا=بالمكان اللي عن العذال والحساد خافي
أخذي اللي تأخذينه كل ذاتي لك هدايا=لو عطيتك كل عمري والله إنه غير كافي
العطايا ما تقاس إلا بجزلات العطايا=هاك قلبي والمشاعر فدوتك يام الرهافي
ازرعي به واحصدي حسن المكارم والنوايا=والله إني مثل ما ني للعهد والحب وافي
ما تغيرني ظروف الوقت لأوفي في هوايا=لأجل عينك كل ما يزعجك برمي به خلافي
الحياة اللي بدونك ما تساوي في مسايا=والحياة اللي معك يا منيتي خير وعوافي
دام حسنك مبهر عيوني تعدتك المنايا=والله إنك جنة الدنيا بلا شك وخلافي
ما تركتي للعذارى من حسن إلا البقايا=وماتركتي لي مجال أشوف غيرك بإنحرافي
يا عسى كل البنات البيض لعيونك فدايا=ياملاك الحسن كله ما يشاف ولا يشافي
أنت ِ(ي)البدر الوحيد اللي ضوى مظلم سمايا=وأنت ِ(ي)العشق الوحيد اللي تدون بإعترافي
إرحميني وإحرميني ما تسوي من سوايا=فدوتك كلي بقانون الهوى ماني بهافي
إرحميني بالعلاج اللي تشوفينه دوايا=وإحرميني من مشي درب الهوى ظميان حافي
لأجل عينك ياغرام الروح بتهون الرزايا=حيث قلبي ممتلي بك عشق وإحساسي خرافي
والله إنك لو تسوقيني لحيضان المنايا=لأرتوي منها لعينك دامني عاشق سنافي
ياهلا بنت الشيوخ اللي تسابقها المزايا=كنها بدر الدجى نص الشهر في ليل صافي