لا تنشديني ليش للحين سهران=اللي ما جرب حرقة الحب معذور
اسهر عشان القلب صايبه حرمان=على السهر يا ناعس الطرف مجبور
دامك بعيد النوم هاجر للأجفان=عدة سنين وعدة أيام وشـهور
ما سلوتي غير القصائد والألحان=والدم يغلي غلي ميًٍ(ن)بتنور
في داخلي من شدة الشوق نيران=كن الفؤاد مركبٍ(ن)فوق دافور
لا من ذكرتك يا بعد كل من كان=مشاعري زفت على القلب طابور
متى تعودي لي مثل ماض الأزمان=نسهر من المغرب ليا طلعة النور
نسبح مع الأحلام والشوق ربان=ياخذ مراكبنا من بحور لبحور
لو أشرب بحورك فلا زال عطشان=ما برتوي من شربة مشابه الحور
كل ما هطلت اصيح بك زيد ولهان=لا زالت أكنافي بعد بعضها بور
واسمع شكاتك والحشا بي شفقان==وأشكي عليك الحال والدم بيفور
وأضم طيفك ضم من صابه جنان=لا والله الا ضم من كان مسحور
مجنون عاقل جاهلٍ(ن)خبل هيمان=حكيم شاعر شيخ فارس و مغرور
مهما يشين الوقت ماني بخسران=دامي بخير وعايش بحال ميسور
كسبان واللي يطلب الستر كسبان=والحمد لله طول الأيام مستور
هذا جوابي ليش للحين سهران=اللي ما جرب حرقة الوقت معذور