يا هلي اتركوني ما بي إلا العوافي=إتركوني لحالي عل يركد مزاجي
علتي يا هلي شيءٍ(ن)عن العين خافي=هو سبب ضيقةٍ(ن)بالصدر بالجوف لاجي
مالقيت العلاج اللي من الضيق شافي=ضيق صدري مطول ما هني بإنفراجي
أربع سنين وأربع والزمان متقافي=ما ضحك يا هلي في يوم طلق الحجاجي
من بعد شوفة اللي يشبه لبيدر صافي=صرت مثل الغريب اللي من الضيم لاجي
كل ما حل ليلي قلت يا ليل كافي=لا تزود جروح هات مره علاجي
هات لي صاحبي وإلا رميتك خلافي=مع ليالٍ(ن)كثيرة روحت بالهجاجي
ليل ما فيه ملهوف الحشا ليل طافي=كل ليلٍ(ن)بدونه ما ينيره سراجي
أتقلب على فرشي وأحثي لحافي=كل ما مرني طيفه يزيد ارتجاجي
مير ما ودي أهلي يعلمون بخلافي=أكتم الهم وأظهر للعيون إبتهاجي
يا هلي اتركوني ما بي إلا العوافي=إتركوني لحالي عل يركد مزاجي