يا أمير أنا عمري تجاوز لتسعين=ما عاد باقي بالعمر كثر ما راح
عندي محل شاريه يا أمير بالدين=ماني مدور فيه يا أميري أرباح
الصك واقف جاوز لعشرة سنين=والكهربة ما جات والحر لفاح
أبوك يامر مير دونه حسودين=ما ودهم إني مثل غيري أرتاح
أوامره نسمع بها مير هي وين=الأمر ياصل للبلديات ثم طاح
لن جئت أراجع قالوا الأمر من فين=ما جا لنا شيءٍ(ن)دعايات ومزاح
يا أمير تكفى يا حفيد السلاطين=طالبك تفزع لي ترى سكري ماح
وغير كثيرٍ(ن)بالبلد حظهم شين=يشكون مثلي والفقر حيل ذباح
رحنا ضحية فقرونا والوراعين=مصروف وأجارات ممسى ومصباح
نبي نربيهم على الخير والدين=وطاعة ولي الأمر نفداه بأرواح
أبوك عاهلنا وحنا محبين=كفه ندي ويديه ما كانت شحاح
وفيك السجايا منه والعدل واللين=صوتي وصلك مصيحٍ(ن)مثل من صاح
مشعل ولد صقر العروبة يا شاهين=فيك الأمل تجعل تعاساتي أفراح
هذا بعض من كل والكل بعدين=يا أمير أنا خابرك للعلم لماح
غلا تحايل نصب والغش للعين=يا أمير كل الوضع محتاج لإصلاح
يا أمير أنا عمري تجاوز لتسعين=ما عاد باقي بالعمر كثر ما راح