يا صاحبي زاد التوجد والعتاب=يا ليتها تنضاف بحسابي رصيد
شكيت مابي للقصيد بلا حساب=لين اشتكت مني طواريق القصيد
قال المثل عنوان مدلول الكتاب=لا بد من بعد المنازل للشديد
صارت سوا جيتك عندي والغياب=لا أنا بفيد ولا أنت مني تستفيد
كل ما فتحنا باب صك الحظ باب=الحظ مدري ليش يا عمري عنيد
تبعت طيفك لين طفل الحلم شاب=اليأس صار أقرب لقلبي من وريد
أحلام نطردها كما طارد سراب=وليا فقدنا حلم نبدأ في جديد
فوق السحاب ومن تحت حد السحاب=نبعد قريب وننتظر حلمٍ(ن)بعيد
مكتوب فوق قلوبنا هم وعذاب=لا أنا سعيد ولا أنت يا حظي سعيد
أيامنا سوداء مثل ريش الغراب=وظروفنا تقسا مثل صلب الحديد
كل ما تلين صعاب يظهر لي صعاب=هم الليالي فوق معلوقي تزيد
مدري رضا وإلا من المولى عقاب=في كل حال الله يفعل ما يريد
حنا خلقنا من تراب وللتراب=نرجع ليا وقت المحاسب والوعيد
يا صاحبي زاد التوجد والعتاب=يا ليتها تنضاف بحسابي رصيد