البارحه نوم عيني طار من عيني=طير الهوى يصفق الخفاق بجناحه
اسمع لصوت الغلا كنه يناديني=واتخيل عطور ليل الشوق فواحه
الحلم كل ليلةٍ(ن)يمه يوديني=اضوي لمضوى الهوى واسرح لمسراحه
قلبي من الشوق لأجل الولف مشقيني=وحبيبي مالكٍ(ن)قلبي ومفتاحه
قلبي على قرة عيوني يوصيني=يا قلب أنا صرت له كفه ومسباحه
يا قلبي أنت السبب باللي حصل فيني=لولاك يا قلب نمت وذقت للراحه
يا قلب طير الهوى يمه يسريني=اسري لمسراه واصبح لمصباحه
إن غاب عني غيابه جمر يكويني=وليا حضر كل هم بخاطري زاحه
أنظم قصيدي على شأنه يسليني=أشكي لشعري هموم القلب وجراحه
وإلا الدوا ما بها منهو يداويني=قلبي ببحر المحبه طيحته طاحه
غرقان شرقان ما حيٍ(ن)يواسيني=إلا ضلوعٍ(ن)من اللوعات نواحه
تبكي على حظي اللي عنه حاديني=البعد وظروف وقتي حيل ذباحه
حال القدر يا بشر ما بينه وبيني=غصن الهوى ما قطفنا منه تفاحه
صرنا من الحب نشبه للمساكيني=يومي بنا الحظ كنه حبل مرجاحه
لا هو يقرب حبيب ولا ينحيني=العمر ما عاد نعرف طعم لأفراحه
الشوق بقلونا مثل السكاكيني=وأرواحنا في غزير الهم سباحه
الوجد والشوق تقطع في شراييني=مشاعري مع حلوم الليل سواحه
أحس جنبي سواة الجمر يصليني=كني متفرش جمر ماهي بطراحه
من حرها نوم عيني طار من عيني=طير الهوى يصفق الخفاق بجناحه