سلام يا دارٍ(ن)بها اللي يستحق انا نسلم=لولاه فيها كان عزينا عن الكل السلام
الصاحب اللي تشرق الدنيا ليا منه تبسم=مشغل لقلبي من سنين طوال في صحو ومنام
كل ما ضجعت لمفرشي أشوف طيفه واتحلم=أشغل لفكري بالهواجس والأماني والحلام
القلب ما بيني وبينه كن دقاته تقسم=والشوق واحد ما يبي غيره ولا فيه انقسام
أحب شوفه وأسمعه وأنصت ليا منه تكلم=كن الحروف تضيع مني وأتلعثم بالكلام
من فرحتي لن شفت زوله أنجذب له وأتقدم=ما كني إلا سهم رامينه من أقواس السهام
مشتاق اقل له كيف حالك كيف حالك وأتعشم=ايقول لي يا مرحبا محروق من نار الغرام
وإن قالها بقول له ما جئتك إلا كنت مغرم=لولا غرامك ما شكيت من المواجع والسقام
كرمان لعيونك تعبت وجئت والمحبوب يكرم=جئتك على العهد القديم وجئت بطباع الكرام
مشتاق أشوف المبسم اللي ساتره تحت الملثم=ما غيرت لونه سمايم صيفنا تحت اللثام
ومشتاق أشم العطر لا من فاح من جنب المزمم=اللي زها به قبل عشر شهور محظوظ الزمام
ومشتاق تحضني على صدرك مثل طفلٍ(ن)تيتم=أبوه وأمه من دقائق ودعوهم بالرغام
ومشتاق أضمك فوق صدري وأتهنى وأتحكم=سواة من دخل سباق وفاز وأعطوه الوسام
من لهف مابي ودي ضلوعي من الضمة تحطم=لعلها تنهي مواجع شوق لن راحت حطام
وإن ما حصل ما نرتجي ماجور يالقلب المتيم=كثير بالدنيا نهايتهم من أسباب الهيام
برحل مثل ما جئت بأحلامي كسيرٍ(ن)ومتندم=سلام مني بالقدوم ومثلها عند الختام
سلام يا دارٍ(ن)بها اللي يستحق انا نسلم=لولاه فيها كان عزينا عن الكل السلام