نا ماهمني من باع للصحبة بدون أسـباب=ومنهو كان هذي فعلته ما ينبكي فوقـه
أنا اللي همني منهو يحده وقته الغصاب=ويبعد والعيون تلد يمي ما نسى ذوقـه
كثير من البشر ما نفقده لن مات والا غاب=وقليل من البشر عليه دوم الكبد محروقـه
على الحائط كتبت اللي كتبته حسرةٍ(ن)وعتاب=على اللي باع عشرتنا وجز القلب بعروقه
يحسب إنه غلبني ما درى إني بالزمن غلاب=أنا ماني بتابع كل نوٍ(ن)تبرق بروقه
ليا من طاب لك ترحل أنا مثلك رحيلي طاب=بأمان الله ملقى خير مطروده ومسبوقه
أنا حرٍ(ن)يعشيني ليا حان العشا المخلاب=وزادٍ(ن)ما كِتب للعبد لو سواه ما يذوفه
لكني ماني اللي يبتدي بالشين للأصحاب=ولاني من يوخر طيَّبه ويقدم زهوقه
أنا عون الرفيق بكل ما يحتاج للأجناب=معه وقت اللوازم ماني اللي يقعد يعوقه
على قول المثل وقت الله الله نفتل الأشناب=ولا نحسب حسابك لحيةٍ(ن)بالموس محلوقه
ليا سِكر علينا باب نفتح بالعقول أبواب=ولا نعجز بمطروده كما ما قيل ملحوقه
على شأن النفوس نعزها ونقدر الأحباب=أبيع اللي تجاوز للخطوط الحمر بحقوقه
أنا ماني رفيق لبائع العشرة ولا كذاب=ولاني من يجادل جاهلٍ(ن)معروف بزهوقه
ما تفرق لو تباعدنا وعشنا بالحياة أغراب=على أهون من الصحبة مع اللي عارفٍ(ن)بوقه
أنا ماهمني من باع للصحبة بدون أسـباب=ومنهو كان هذي فعلته ما ينبكي فوقـه