ما بقا في فؤادي مضربٍ(ن)للسهام=ما بقا غير حسرة ساكنة بالصدور
لبست اللون الأسود فاتنات الحلام=صارت عروق جسمي للمشاعر قبور
صار هم الليالي فوق صدري وسام=ما بقا في شفاهي بسمةٍ(ن)للسرور
ياخناجر زماني لو طعنتي بسام=الجسد من طعون الوقت فاقد شعور
لا تخافي ذنوبك استحلي حرام=والمحاسب بيوم البعث عقب النشور
انحري للمودة واذبحي للغرام=مابها ما نخافه يالزمان العقور
دام منهو نوده سل سيف الملام=كل ماهو جميل عقب فعله يغور
عكر لجو عشقي عقب ما كان خام=أحرق لدم قلبٍ(ن)كان قبل محرور
صرت ماني بخير وحالتي ما ترام=إنكسر قلبي اللي قبل حبه جسور
هد ما هو بنيته في قديم العوام=هب يا حظٍ(ن)أقرد زود الجور جور
كل ماهو حلمته راح كله عدام=في ثواني تطاير مثل داخن بخور
سو ماهو بدا لك يافراخ الحمام=وإعلم إني لزلاتك حليمٍ(ن)غفور
ماني اللي يبيع وصاحبي ما يضام=ولاني اللي يغطي خلته بالغرور
الوفا والتجاوز طبع كل الحشام=المواجع تراها للخطايا طهور

المشاركة الأصلية كتبت بواسطة رباح دبيان البيضاني (المشاركة 161923) صح السانك ........... ابا حازم ........... وماكل ذنب يغفر الله عز جلاله لايغفر لمن اشرك ويغفر لمن يا شاء لما دون ذلك .......................