كثير أشياء تضيع قيمة الرجال بين الناس=ليا منه تبعها ضيع لدنياه مع دينه
بدايتها ليا منه نسي ربه وركب الرأس=يبي هذا يبي هذا ولو ما تملك يدينه
يجالس من يصادف ما تخير طيب الجلاس=ولا يقنع بما عنده وزينه خالط لشينه
وثالثها ليا منه تصادق مع نديم الكأس=ليا وصل لهذا حول يالله بيني وبينه
دروب تضيع المعقول تالها ندم وإفلاس=ليا حده زمانه مالقا لإنسان بيعينه
ورابعها ليا منك وثقت بذمة البلاس=سواة اللي يشيل الماء ومخرومة مواعينه
يدوسك لو تمكن منك حيثه دايماً ينداس=على غفلة عباد الله يشحذ في سكاكينه
وخامسها كثير الهرج والهتال والدساس=على كل الجهات الأربعة فاتح دكاكينه
يسوي له سوالف مالها مصدر ولا مقياس=ليا خف العقل الرجل بيضيع مضامينه
يشيد له قصورٍ(ن)مالها مثل المباني ساس=على ما قالت الأمثال:غاوي فارغه عينه
وسادسها ضياع العمر بين النوم والمجلاس=ليا ضاع الشباب الشيب وش نفعة سنينه
وسابعها طريق الغدر ذبح كليب من جساس=قعد قصة تداولها العرب وقت ومجانينه
وثامنها مضيع حجته لو هي على القرطاس=ليا عميت بصيرة مدعي ضاعت براهينه
وتاسعها مصدق للكذوب ومرتجي حباس=غناوي ما درى عن وقته وحالة مساكينه
وعاشرها مودع للحمر ومضيع الأفراس=خسارة رجل بين الناس ضايعةٍ(ن)قوانينه
كثير أشياء تضيع قيمة الرجال بين الناس=ليا منه تبعها ضيع لدنياه مع دينه