كنت احتفظ بالصور كله على شأنك=والليله أجمع تصاويري وأحذفها
ماكني العام قلبي صاير أوطانك=أشياء كثيرة بعد روحتك عايفها
نسيت حلو الليال بسبة طعانك=وأذكر حلوم تلاشت قبل تنصفها
عهدي بها يوم غطا الجو بركانك=راحت بوسط الحمم قدام أصرفها
غدت ضحية تهور منك وجنانك=ما باقي الا مواجيعي وتحسفها
الدم ينزف بقلبٍ(ن)كان مسكانك=والهم حلو المشاعر صار يجرفها
هدمت في داخلي أسوار بنيانك=حلو الأماني جفاك الشين ناسفها
أسقطت حكمك لقلبي وجور سلطانك=حررت روحي بعد ما كنت كاتفها
بانت لي الوان حلوة غير لألوانك=أشياء كثيرة قبل ما كنت شايفها
قدام أشوف الحياة بنظرة أعيانك=واليوم روحي تروى من معارفها
صفيت حياتي وشال الريح دخانك=نبتت صحاري لهيبك كان منشفها
قفل على ماضي الأيام بيبانك=لاعاد تفتح على الماضي درايفها
ما عاد أنا فارس لخيلك وميدانك=كسرت كل القيود اللي تلفلفها
خرجت من عالمك يافتنة أزمانك=ماني بمجبور لك روحي أوقفها
إشبع بدنياك ماني قاضب عنانك=تزين والا على ما تريد فاتلفها