نفسي اشم الورد واضم الاحساس=واسهر مع الاشواق في كل ليله
من كثر شوقي لك أنا بشربك كاس=واقول زيديني منه يالبخيله
ادمنت معسول الشفايف والألعاس=من ثغرك الدافي سحرني مسيله
ماهو غريب ان جيت احطك على الراس=دامي هويتك يالهنوف الجميله
ماهمني هرجن سمعته من الناس=الناس وشله بين خل وخليله
الله يجازي كل حاسد وبلاس=من جنس فعله بالردى والفشيله
يامنيتي لا يزعلك هرج الانجاس=النجس هرجه مالقا من يشيله
يبطون والله مايجيبون هالراس=أنا لعينك كل حملن اشيله
لصار حبي لك بنيته على ساس=أنا اتحدى منهو يقدر يزيله
واللي يمسك والله أنه لينداس=ويبشر بسيفن من يميني يجيله
الزير والله ماتركها لجساس=وكليب ماهانت عليه الجليله
ودي اشم الورد واضم الاحساس=واسهر معاكي يالعيون الكحيله

يا شاعرٍ(ن)دقيت للشعر الأجراس=في ساحة الميدان نسمع صهيله
قدامك الميدان روض للأفراس=إقدح زنادك وأشعله بالفتيله
الورد لونه زين ويريح أنفاس=في كل وقت الورد ما جاء مثيله
كم واحدٍ(ن)من شمته صار محتاس=وكم واحدٍ(ن)ضيع لعينه حصيله
يا شاعرٍ(ن)تنظم قوافي بمقياس=وردتك يا شاعر من أيت فصيله
هي من الجوري ليا هب نسناس=يداوي شذاها للقلوب العليله
والا من اللي سعرها يغلب المأس=ما طبت لسوق المزاين تخيله
وصفك لها غالب على كل هوجاس=مقياسها بين الوسط والطويله
الطير يا شاعر هجيني وقرناس=والخيل فيها صافناتٍ(ن)أصيله
ومن لا يصون النفس من كل وسواس=تومي به الأرياح لو هي قليله
ومن لا يصون الود عن كل عساس=يتعَب ويتعِب صاحبٍ(ن)يرتجيله
ومن لا يشب النار في روس الأطعاس=أخير له يقعد مكان الحليله
ومن لا غدى دون الغلا جمر قباس=لو مات يا شاهين ما ينبكيله

صحت أبدانكم جميعا سعدت بتواجدكم


لك خالص تحيتي