مرت علي أوجاع وظروف وهموم=ما فرت الدمعه على صفح خدي
ومرت علي أيام صلفات ودحوم=ما لنت قاسي مثل أبويه وجدي
ومرت علي أحوال تقعد من النوم=قابلتهن كلي شموخ وتحدي
ما هزني الا أنت لا كنت مضيوم=يا ملك(ن)قلبي وبوحي وسدي
لا من شعرت إنك تشره ومكلوم=يضيق صدري شرهتك ما تعدي
تطعن معاليقي مثل طعنة سهوم=مقدر علاها لين حيلي تهدي
ليتك زهقت الروح بسلاح مسموم=والا طلبت أقضي عليها بيدي
أخير من ظنك ولو كنت محشوم=عن كل زلة وأنت فاهم لقصدي
سو الذي يرضيك بالليل واليوم=إطعن على كيفك بقلبي وكبدي
ما عاد يفرق عندي الموت يا قوم=ليا كان هذا يرضي اللي نودي
تفداه روحي لجل عينه بلا لوم=همي رضاه وضيقته هي نكدي
يفدونه العربان والفرس والروم=حيث إنه أغلى كل الأجناس عندي
مهما يسوي في برضا بمقسوم=لو فرت الدمعة على صفح خدي