الغصون اللي تلاعبها الهبايب=
مثلها مثل القصائد والمشاعر=

كل ما هبت غدى الهاجس لهايب=
كن جمر ٍ(ن)من غضا في صدر جابر=

طار نوم العين والسهرة غصايب=
لين تطلع شمس بكرة للنواظر=

أنظر لطاروق شعري ويش جايب=
عل بالطاروق جبر ٍ(ن)للخواطر=

ياقصيدي هاجسي ماهو بطايب=
طول ليلي متكي والعقل طاير=

أتذكر مامضى لي مع حبايب=
يوم كنا مثل ورد بجو ماطر=

ليت ذاك الوقت يرجع بالعجايب=
والظروف تزين وتزول المخاطر=

كان ياليل السهر ما رحت خايب=
والقصيد اللي لفى ما مر عابر=

مير ذاك الوقت قفى والغلايب=
دوبها حلت على منطوق شاعر=

شاب شعري مثل ماني صرت شايب=
وأتذكر ليتني ما كنت ذاكر=

الغصون اللي تلاعبها الهبايب=
مثلها مثل القصائد والمشاعر=