قالوا الناس قبلي بالسوالف هموز=ما يجي بالسهولة مايسمى ثمين
كيف شيءٍ يجوز وشيء ماهو يجوز=كل خافي لا بده بعد حينٍ(ن)يبين
ومن تعدى حدوده ينرمي بالحجوز=وكل قاسي لابده بعد قسوة يلين
محد ضامن بعمره كل مرة يفوز=ولا أحد حقق مكاسب مابجنبه عوين
المرامي تفاوت وكل مرمى بنوز=والمعاني تقاطع بالردي والسمين
يكبر الطفل حتى يصير كهلٍ(ن)عجوز=ثم يرجع على أصله طين في جوف طين
وبين هذا وهذا يطلب لما يعوز=يطول شيءٍ وشيءٍ ما تطول اليدين
وده إنه جميع اللي تمنى يحوز=ما درى بالنهاية كل ما جاب وين؟
كل دنياه ما تسوى ثمن قشر موز=ما يفيد البنا دم غير تقوى ودين
في نهارٍ(ن)مكانه بالكتاب محجوز=بجنة الخلد والا بنار مقعد مهين
ذاك وقت التفاخر والأمن بالحروز=والندم مايفيد مطاوعين اللعين
يالله اجعل نصيبي من ثمين الكنوز=في نهار القيامة ياأرحم الراحمين
قالوا الناس قبلي بالسوالف هموز=ما يجي بالصعوبة غير شيء ثمين

همسات


شكرا لحضورك الراقي وتعليقك العذب



صح بدنك ولا هنتي


لك خالص تحيتي

صحت ابدانكم لا هنتم جميعا


سعدت بحضوركم وتعليقاتكم


لكم خالص تحيتي