قلبي وعقلي والمشاعر فداياك=والروح والاشواق فيني تناجيك
احلى الكلام اللي تقوله شفاياك=واحلى حلوم العمر ماكان ياتيك
اهواك كلك من جديلك لماطاك=ياعلني ياقرة العين ما ابكيـك
والله لولا البعد حادي ويحداك=اني لقوم الان بالتو واجيك
كرمان لعيونك على شأن بهواك=يا أغلى من الغالين في عين مغليك
لقيت فيك الطيب والحسن يغشاك=من هامتك حتى مخامص مواطيك
ولقيت فيك الذوق فديت مرباك=وفديت منهو فوق الأخلاق رابيك
من كل زين وزين يازين يزهاك=ما ينقصك إلا تريح مهاويك
يا مشغلٍ(ن)كلي من أدناك لقصاك=في كل صبح وليل روحي تناديك
مشتاق لك ودي بشوفك ولقياك=لكن مدري كيف وشلون الاقيك
دونك عوايق تذبح لحلم ينخاك=بأسبابها أحلام عمري مهاليك
عدة سنين أهواك وأموت ما أنساك=مهما يشين الحظ ماني بناسيك
قلبي وعقلي والمشاعر فداياك=والروح والاشواق فيني تناجيك