لقيت لي ظبيٍ(ن)من الصيد جافل=البطن ضامر والنواحر سمينه
حريص ما ينصاد ماهو بغافل=ياكم قناصٍ(ن)رجع بالغبينه
رميتها ركاد ماني محاول=رمية معلم في فؤاده مكينـه
قالت علامك قلك ماني مجامل=قناص وارمي صيدتي يا ذهينه
الرمي ما يركد ليا صار شاتل=والرمح ما يطعن ليا جاه لينه
مير اسمحي لي بالوصل والتواصل=الوصل يبري للقلوب الحزينه
نبغا نتواصل بالشعر ونتراسل=والسر من خلف الجنوب المتينه
ونبغا نكمل بعضنا ونتكامل=نروي قلوبٍ(ن)للهوى مستبينه
ونبغا نتواعد وحدنا ونتقابل=يمكن تزين ظروف كانت مهينه
نبغا نسولف بالغزل ونتغازل=الحب خير من الحفا والضغينه
نشرب من الشهد النقي بالمناحل=اللي جناه الزين من كل عينه
نشرح مشاعر كان فيها تداخل=الوقت شابه بين زينة وشينه
يالجادل اللي ما ينافسك جادل=كل المزايا فيك حلوة فطينه
فيك الأدب والذوق والحسن كامل=مثلك تفاخر به قبيلة جهينه
حرة وبنت شيوخ سقم العواذل=متميزة بالبيض حشمة وزينه
ما قلت ما قلته نفاق ومجامل=إلا حقيقة واضحة يا حسينه
الشعر ينقاد لك من دون فاصل=كن القوافي تعشقك يا ثمينه
حسنك سحر بالخلق جاهل وعاقل=وبسمتك تجلب للقلوب السكينه
جيتك من أقصى الشوق ماني بجاهل=لكن جبرني قلب كنه مكينه
يرجف بحبك بالخلا والمحافل=باني لك وسطه قصور ومدينه
يا بسمة الأيام طالب تكافل=ينقذ لروحي من ليالٍ(ن)لعينه
قلبي على موج الهوى جاك حافل=يحمل حلومي والمشاعر سفينه
هذا الذي يا بنت الأجواد حاصل=أحلام عمري في غرامك رزينه
أما إرحمي وإلا ترى الحب قاتل=روحي فدتك الروح عندك رهينه
يا ظبيةٍ(ن) جتني من الصيد جافل=البطن ضامر والنواحر سمينه