اشهد انك من رجال العرف كيال الوزاني=في مجال العرف والا الحرب عزوتك الرهافي
قاضيين النار تلهمهم وواحد فالجناني= في هذاك الوقت مافاد الندم والا الحسافي

ما عليكم زود يا راع السمينه والسماني=أنت دايم في يميني الحذر تقعد خلافي
الله المعبود واحد مالنا معبود ثاني=يا خشير القوم حذرا لا تذكون العجافي

انت عضدي في نهار (ن) فيه روغات الذهاني = صفنا دايم قوي ولايجي فيه انحرافي
والله اني ماغزيت الا بمصقول (ن) يماني= مار انا خايف من اللي يستعي قبل الطوافي

لا تصيح يارفيقي قبل ما يحين الأواني=أنت في نعمه كبيره مكتسي منته بحافي
دام بحزامك رصاص ودام بيمينك سناني=لا تخاف وشد حيلك لا تلحف باللحافي

كلها حشمه لواحد في مواقيفه نخاني= اعرف ثقال العلوم ولا اتجه يم الخفافي
الغليبه في مجال السبق تحسب شي ثاني= وانت تعرف يارفيقي هرجة الناس الضعافي

من نخاكم يازميلي قبل ما جاكم دعاني=والقضيه كلها فنجال دله من مصافي
لا تسمع للهروج ولا تماري بالرهاني=المشارك بالمواقف للنشاما شيء كافي

اشهد انك جبتها والعلم ياالغالي كفاني= والمطر لو هو رشاش اخير من ذكر الجفافي
مار بعض الناس يابو زيد مصيوب بجناني= ياالله ارزقنا القناعه ياالهي والعفافي