هذي مجموعة من قصائد الشاعر الكويتي حامد زيد أنثرها بين أيديكم وأتمنى أتعجبكم


الجـمـّـهـره



إي بالله أخطوا والخطا اللي جابهم عـيـن الصواب = مبطي وأنا أشوف الطمعّ يكـشف رداهم وأستره
مايملي عيون الحسود بهالزمنّ غيـر التـراب = ومن لايتوب من الخطا تحـرم عليـه المعـذره
اللي من أولهـا خـراب أكيـد تاليهـا خـراب = والبندق اللـي ماتثـور فـي هدفهـا تذعـره
ودك اليامن جاتك الغلطه مـن النـاس القـراب = الصاحـب اللـي ماكسبـت محبتـه ماتخسـره
مشكلتي إني ماعرفت أحسب لصدتهـم حسـاب = قلطتهم صدّري على ذكـرى قصيـد وحنجـره
صوت ٍ يصول بمنبره واخطاب مامثلـه خطـاب = والطيبه اللي زعزعت صوت الخطيب ومنبـره
مافيه دمع ٍ صوبوه أحبابـي بوجهـي وخـاب = ولازرق حزنـي علـى غالـي ولافـج انـّحـره
كل الزهاب اللي معي ذكرى من أصحاب الزهاب = واللي بقالي من عذاب اشرس طريقي وأخطـره
لأني تجنبت الغرق.. عـديت من فوق السحـاب = لأن أكثر أصحابي ورق.. ماشفت للطيب إثمـره
والله ماحطيـت بيـن الحقد والخـوه حـجـاب = حتى غـدوا ربعي يحدوني على الضيق أشكـره
البارحه ثـارت علـي رقـاب وأوتنـي رقـاب = البارحـه ياثـقـل دم الـبـارح ويامحـقـره
أثر المصايب ماتجيك إلا مـن النـاس القــّراب = وبهالزمن حتى الخوي اللي تثـق فيـه أحـذره
أهب ياوجه الحسـد وشلـون جمعهـم وغـاب = كيف السنين اللـي عطتنـي بعثرتهـم بعثـره
لابارك الله في رفيـق ٍ تزعـلـه كلمـة عتـاب = ولاجمـع الله الرجـال اللـي تفرقهـم مــره
الصاحب اللي مايجي من صحبته غير العـذاب = نذر ٍ علي إن ماهجرني وإلا أنا اللي بـ أهجـره
من يفتح لفرقاي باب أفـك لـه عشريـن بـاب = وأذا خويـي مايقـدر خوتـي مــا أقــدره
عـوّدت نفسـي كـل ماشـددت لليمّـه ركـاب = مأصد وجهي عن طمـوح إلا لياجبـت خبـره
أن روّحوا فأنا بـري منهـم ليـوم الحسـاب = وإن جرحوا قولوا لهم ماحركـوا فيني إشعـره
شفهم لهم حول السنه ولا خذوا منـي جـواب = أحسـن دوا للـي يحـاول يستفـزك تحقـره
ماكنت أحاتيهم صغيّير ..عاد أحاتيهـم شبـاب = الصاحب اللي ما أذخره لليوم الأسود ما أذخـره
شفني جمعت أوراقهم بكتاب وأغلقـت الكتـاب = ياوقت لـمّ اللـي تلمّـه وأنثـر اللـي تنثـره
اللي يخاف من الظما يترك لنا طـردّ السـراب = واللي ماهو بقـد الظـلام ووحشتـه لايسهـره
عقب أكـتـئاب البارحه ماعاد انا حمـل إكـتـئـاب = الطيب جرجرنـّي وانا مانـي بناقـص جـرّجـره
انا تجرعـت الظما ليـن أحتـرق وجهـي وذاب = انا كسرت بخاطـري قبـل الصداقـه تكسـره
انا خسرت اللي غيابه غير عـن كـل الغيـاب = انـا غفـرت لعالـمٍ ماتستـحـق المغـفـره
انا أكثرأنسان تعلم من كثر ماأخطأ وصـاب = انا أخر لسـان يتكلـم فـي زمـان الثرثـره
انا القصيد اللي فزع من دفتـره مليـون نـاب = وانا الوحيد اللي جمـع مليـون نـاب بدفتـره
جفني وجرّحه السهر ، حيلي وهدّتـه الصعـاب = دمعي هـدّر.. ضحكي نـّدر.. عـمري وضيعت أكثـره
شيبت بعقـول العرب.. هيبـت روس ٍ ماتهـاب = جمهرت ناس ٍ عمرهـم مايعرفـون الجمهـره
ماصرت ذيـب إلا لأن اللـي تحدونـي ذيـاب = ما كنت أغيـب إلا لأن العفـو عنـد المقـدره
ترى حلاتـك لاحملـت لصاحبـك كلمـة عـتـاب = أن مانطقـت بهـا بوجهـه ماتذمـه بظهـره
في هالزمن مايملي عـيون الحسـود إلا التـراب = والا الحظيظ.. الطلقه اللـي ماتصيبـه تذعـره
ودك اليامن جاتك الغلطه مـن النـاس القــّراب = الصاحـب اللـي ماكسبـت محبتـه ماتخسـره


التمثال



عفا الله عن غدر الظلوع والخناجر ابطال= بسامح واتركك تحت الظلام لحالك لحالك
دخيلك وفر دموعك ترا هدر الدموع ذلال = وترا ما فيه احد يصبر مثل صبري في غربالك
انا عيب علي انقض كلامي والرجال افعال = وان قلت ابقطع حبالك تراني ابقطع حبالك
عشان اكسب هدب عينك تجرعت العذاب اشكال = وليتك ترأف بحالي عشان ارأف بحالك
مسوي في حياتي شي ما يذكر ولا ينقال = حشى حتى العدو وهو العدو ما يعمل اعمالك
تمسيني على الهم وتصبحني على الغربال = تقلطني فناجيلك وتقصر عني دلالك
تحملت التعب لجلك وانا حملي يهد جبال = رحلت من العذاب وما وقفت الا على جالك
علامك كل ما اجيك متواضع جيتني تختال = معاك لمتى بصبر وصبري معك يحلا لك
مثل ما اقبلت لعيونك لزوم ترد لي بقبال = ومثل ما قد حشمتك حس واحشم قلبي اشوا لك
انا محدن بجابرني اساير معك هالمنوال = ترا لاني تبيع لك ولاني اصغر عيالك
انا جيت اعشقك نبض ومشاعر ما اعشقك تمثال = انا جيت اسكنك واحياك وابقى فيك وابقى لك
انا جيت بضمى عاشق تعب يطرد سراب الال = انا جيت استفتز رضاك من فرقاك ولجالك
انا ما همت بك عاقل انا كنت اعشقك بخبال = انا ما كنت احبك حي انا كنت اعقشقك هالك
تخيل من كثر ما اخاف تلقى للزعل مدخال = اخاف اخطي على طيفك وادوس برجلي ظلالك
تبعتك والعرب تتبع رعود البارق الهمال = وانا شفت المطر يتبعك في حلك وترحالك
كأن اللي خلق حسنك خلقني مع جسدك ظلال = وصرت اقرب جسد يمشي معك في قفاك وفي قبالك
ابي قلبك يحس انه فقد في محبته رجال = ملكته من هدب عين وخسرت رضاه بأهمالك
صحيح ان الفراق اقسى ولكن الوصال محال = وانا صعب علي ارضي غرورك واضعف قبالك
بعد ما حققت عيني في بعدك لرقاد آمال = اعود للسهر ياخوي فال الله ولا فالك
ببدل نظرتك فيني واجي لك كل يوم بحال = بكون اقرب من ثيابك عليك ولا تهيى لك
بلمك وانثرك واجمعك وارجع وانثرك بهمال = ابخونك وازعلك وارضيك وازعل منك وارضا لك
ابرسم بالثرى وجهك وبدفن صورتك برمال = ابشكي للعرب فرقاك واضحك عند عذال
ابهديك الوصال فراق واهديك الفراق وصال = بسوي مثل ما اشوفك تسوي وافعل افعالك
عشان تعرف من فينا الزعول ومن وسيع البال ابيك تذوق فنجالي وانا بذوق فنجالك
نصيحه واحتفظ فيها قصر معك الزمن او طال = ابي تسمع كلامي زين وتحطه على بالك
اذا حبك هبال اطفال الك عندي هبال اطفال = ولا وابشر بعد بهبال حباً ما هو بهبالك
واذا قصدك تهين اسمي عشان تشمت العذال = حشى لا انتا ولا غيرك ولا عشره من اشكالك


عاتبوها



بعد ما قابلتني عاتبوها = على شوف الحبايب حاسبوها
خذوها وابعدوها غصب عني = وعن وجهة طريقي جنبوها
وشالوها عن عيوني غصيبه = عواذل واغصبوني واغصبوها
خذوها من يديني شوف عيني = وعن عيني تعدوا واحجبوها
كلام وصدقوا في البنت كذبه = وهم اللي من اول كذبوها
وهم وشدخلهم في مال بيي = لأبوها والخلايق طالبوها
وفيه ما تخون ولا تعاند = جسوره والمواعيد ارعبوها
ملاك كامله والكامل الله ولكن العواذل عذربوها
وهي كل ما دعتني تشتكي لي = عن اللي سالفتنا سربوها
تخاف وتلفت مع كل كلمه = تظن ان العواذل راقوبها
تلفت من عقب ما هي جريئه = شجاعه ما تهاب وهيبوها
واهديها وانا حاير وثاير = مصيبه يا عذاب عذبوها
وهم كل ما خذوها عن طريقي = تراهم صوب قلبي قربوها
وانا ما تعبت قلبي خيانه = خيانه رتبوها وحسبوها
ولا يعجز خفوقي لا يقابل = جفى من حاربوه وحاربوها
وانا لي عزة تفرظ علي = اخاطب بالجفى من خاطبوها
واكسر لوحة الماضي وازيله = واخربها مثل ما خربوها
واذوقهم ندم ما صار فيها = واشربهم من اللي شربوها
وادلعها واولعها بنفسي = واشرقها بعد ما غربوها
واعوضها عن اللي راح كله = وعن ذيك الليالي كل ابوها
غلاها بالحشى لا زال ثابت = ولو حتى بغيري حببوها
وغلاي بقلبها مر وتعدى = غلاها لأمها والا لأبوها


اربع خناجر



مشكله لا جت حاجتك في يدين البخيل = ما يفكك لين تدفع كثر ما تدفعه
ومشكله لا صرت مطعون في كفوف الدخيل = في ظهرك اربعه خناجر وفي الظهر اربعه
ومشكله لا ضاق بالوقت رجال ثقيل = يطلب احبابه وعيا زمانه ينفعه
ليت ربي ما يحاسب خليلاً من خليل = دام مال للحظ فزعه ولا للوجه اقنعه
ودام مال العذل تالي وما بالحيل حيل = الغلا سماً نذوقه ومراً نجرعه
نحتري فيه اللقى والحصيل هو الحصيل = مثل حلماً ما تحقق وعيت اقطعه
كني اللي حط الشفاة في الجمر المرير = لا قدر يرميه للناس وازرى يبلعه
والظروف اللي حدتني لنيران وفتيل = عرضت دمع المحاجر لشي يجزعه
والمدامع بالغلا لا تحال ولا تحيل = والمشاكل كل ما جت جات مجمعه
اعذلوني عن هوا النفس وعيوني تخيل = في حبيباً ما تركته ولا زلت اتبعه
مغرما في حب مثله ولا ارضى له بديل = عيني تشوفه وقلبي يجوع ويشبعه
ذاك كل ما زان بالي وطالعت النخيل = ما ذكرت الا ثباته بوقت الزعزعه
ما هو الا قطعة من حشى قلب عليل = وماني الا قطعة منه مخلوق معه
لا جميلاً شفت قبله ولا بعده جميل = العذارى رهن رمشه وانا رهن اصبعه
والله انه لو طلبني طلوع المستحيل = لأطلعه مني مناك يعني لأطلعه
ما علي من الملامه ولا هرج الهبيل = ما اشجع الرجال لا ثيره غيره ما اشجعه
في عيون اللي عشقني ولا حاني هزيل = الله اللي حط عشقه في قلبي وزرعه
لو سكت ينظق له الصم والدنيا تسيل = وان حجى لو يمشي المزن ياقف يسمعه
سلسبيل من شفاته يخالط سلسبيل = معمعه بسكات واحلى سكات بمعمعه
ما هقيت ان اكثر الليل يمرح بالجديل = لين شفته شوف عيني بكفه يرفعه
وان حييت وما بقا لي معه ليل = لأسهره بأول غروبه واموت بمطلعه
والله ان العشق جمره وطاحت بالشليل = وان حصل ما طاعك الوقت في احبابك طعه
منهو اللي عداي نكران الجميل = ومنهو اللي خان خلي وحاول يقنعه
كل عاذل ردني عنك يالطرف الكحيل = يا عسى الله يقلعه يا عسى الله يقلعه
يامعرض قلب الاحباب بالدرب الطويل = السعه لا بارك الله بالضيق السعه
والله ان الوقت قاسي وانا ماني ذليل = واشهد ان الرجل مرات ظنه يخدعه
وانتم تعذلون خفاق بعيون العديل = ما رحمتم نار جرحه وحيرة مدمعه
والسوالف ليلها ليل والحايل يحيل = والمشاكل مشكله مشكله متجمعه
مشكله لاخانك الوقت بالحمل الثقيل = لو زرعت الزرع هوج العواصف يشلعه
ومشكله لاصار عاذلك ما يبرد غليل = لا ترده طيب كلمه ولا احد يمنعه
ومشكله لا صرت مطعون بكفوف الدخيل = في ظهرك اربع خناجر وفي الصدر اربعه


الـسـفـيـنـه



ضاقت وساع الفيافي والوعد متن السفينه = للطريق اللي دعاني بعد امان الله وامانه
لا تناديني وصوني قلبج الله لا يهينه = لا يراهن في رجوعي لأجل لا يخسر رهانه
ليه ما ارحل عن غرامك بعد ما ذقت الغبينه = اذكري لي شي واحد يستحق اقعد عشانه
قلب ما حن لوصالي ماني بحاجة حنينه = واشهد انه ما يعزر بالرفيع الا هوانه
الهوا الغدار حد الله ما بيني وبينه = والرجل لا خير فيه ان ما حفظ قدره وصانه
واحد مثلي ليما حدته عوجا سنينه = ما شكى لأقرب بن آدم لو هو اغلى من اخوانه
يوم قلبي ما عصاك وما قدرتي تذبحينه = ليه خنتي فيه وانتي معه من نفس الديانه
كان ذبحي بأيدك ارحم لي من اللي تفعلينه = وان طلبتك تذبحيني ما ذبحتيني لعانه
كل جرح من جروحي تذكرينه تنكرينه = كان مالك في نزيفه يد خانت بالامانه
ينزف الخافق تواضع لين لطختي جبينه = والا انا ما كنت ابيها تاصل لحد الاهانه
قلت من باب الميانه صاحبك وتعذبينه = لعن ابوك ارخي معاي شوي ما صار ميانه
طعت عقلك يوم قيل ان العقل بالبنت زينه = لكن الشرهه علي اللي كنت احسب انك تكانه
من بعد ما كنتي انتي في حشاي اغلى سجينه = بأوعدك ابطلق سراحك واتهمني بالإدانه
وين رايح ؟ لأي درب ما يرجع للمدينه = ليه رايح ؟ لأن قلبك ما ترك قلبي وشانه
كيف ابنسى ؟ ربي اللي ملهم القلب السكينه = مثل ما عانه بقربك لانوى فرقاك عانه
كان قاسي يجرح اطراف السكاكين السنينه = ما يطيح وبنت مثلك حبها هزت كيانه
والا انا خابر خفوقي ما يمد الا الثمينه = وان بغى يغيض الثريه قعد القمره وزانه
مزعل لأجلك هنوفاً رجت عقول رزينه = وان تهادت بالطريق الجرهدي تزهر جنانه
جادلاً كن الجمال قبالها كتف يدينه = والقمر لو شاورت له ينزح وتقعد مكانه
كانت اول من تحكم في فروع الياسمينه = وان تعدتهن تفنن خيزرانه .. خيزرانه
بعتها لأجلك وصارت لأصغر اطرافك رهينه = والا هي لفتت هدبها تغمرك ثقل ورزانه
والخفوق اللي تغذى من معزة والدينه = مشكلته انه تعلق في زمن ما هو بزمانه
كل ما زادت جراحه واكتشف غلطة ظنينه = صدقيه ان قال ما به شخص يستاهل حنانه
يوم نادى يا فلانه ما رضيتي تسمعينه = لين صوت يا فلانه .. يا فلانه .. يا فلانه
كنت اشوفك زعفرانه تقرظ الورد وتدينه = يمكن اني ما قطفتك بس اشوفك زعفرانه
كنت اهاب البعد عنك واطلبك لا تذكرينه = كان خوفي من الفراق وخطوة الفرقا جبانه
ما اقتنعت ان الخيانه للرجل تلوي يمينه = لين ما ربي بعثك وذقت من طعم الخيانه
اسمحي لي ما بقى فيني مكان تطعنينه = واقبلي من جوف قلبي كل عطفه وامتنانه
والله الله في عذابك ابتركك عينك ابعينه = دلليه ولا يرده عن شقاك الا لسانه
والا انا قررت اسافر وامتطي ظهر السفينه = لأن ما به شي واحد يستحق اقعد عشانه


الحلم



فوقت من البطا وبليل تتراقص شياطينه = بعد شفت الظيا ينزع من ثياب المسا ثلثين
تحايلت المنام اللي مثل بيتك تمرنيه = وانا اللي من تفارقنا وانا ما غمضت لي عين
غريبه كل حلم يمر في رقادي تزورينه = والاغرب كيف احلم الحلم وارجع واحلمه بعدين
قبل يومين شفتك في المنام وقمت من حينه = ونمت امس ورجع نفس المنام اللي قبل يومين
انا اللي قبل اسافر شلت قلبي من شرايينه = تركته في يدك مثل الامانه واحفظيها زين
ترا حفظ الامانه دين مجبوره تردينه = اجل ما فيه احد جد قال لك رد الامانه دين
مرد المقفي بيلفي ويستوفي وتوفينه = بعد ليله ثلاثه اربعه عشره شهر شهرين
اذا انتي ما انتي قد الكلام اللي تقولينه = حرام استأمنك حاجه واذا جيت اطلبك تنسين
تخونين وتبين ارضى واحد يرضى تخونينه = انا لا جيت اخونك مع حبيبه ثانيه ترضين
من اول ما رجعت من السفر ما شفت لك بينه = وانا اللي كنت احسبك قبل لا ادوس ارض المطار تجين
تكونين انتي اول شخص تحتظن عينه = وكنت اتخيلك من زود فرحة رجعتي تبكين
واشوف في عيونك حكيك واعرفه قبل تحكينه = واجيب احلى من اللي بتحكينه واتركك تحكين
تقولين الوطن نور واقول بنور مظوينه = تقولين غديت احلى واقول عيونك الحلوين
كلام نام في شفاهك وخفتي لا تصحينه = ذخرتيه للغرام اللي ينام ويتركك تصحين
تغانمتي غيابي لين رجحتي موازينه = تعلم من يدك لمس الكفوف وعلمك تجفين
وليتك لاقيت به شي فيني ما تلاقينه = ما هو بغرور لكن خابرك مالك امل تلقين
تغافلك بغلا والا الحلا ما هو بمن زينه = تزينه الصور والا الصحيح إبن الحلال زوين
وانا ماني بناقص عنه يوم انك تبدينه = نصيبي هو نصيبي لو يسددها من الصوبين
قنوع بمظهري والسم ما يذبح ثعابينه = على قول المثل ماني حلو لكن ما ني شين
اذا اهداك الزهر مره فأنا اهديتك بساتينه = واذا الهاك بفرح ليله فأنا تهت لبكاج سنين
واذا استضعفتك املاكه وشتتك ملايينه = انا حتى فتات الخبزه اقسمها معج نصين
طموحي بس اجي واظفر بشي تستحقينه = تدينته تسلفته سرقته مو مهم منين
كأني كثر ما ارضى بكل اللي تتمنينه = لو تطلبين الله يعنيني بقول آمين
انا ما العب على الحبلين وقت الطيش وسنينه = تبيني الحين يوم اني كبرت العب على الحبلين
ترا عند البدو بالذات عيب اللي تسوينه = حلاتك لاعشقتيني تعشقيني ليوم الدين
غرام نسكن ظلوعه حشيمه من مجانينه = جفى يجمع معزتنا ولا عشق يذل اثنين
كثار اللي تحدوني وقالوا تحبينه = امانه لا تخليني صغير في عينهم .. تكفين
لأني كل ما قالوا تخون اقول مسكينه = عليك الله وامانه علميهم من المسكين
انا خايف ليطاح الجمل تكثر سكاكينه = وانا ما عادت ظلوعي تتحمل طعنة السكين
مثل ما قالوا المكتوب واضح من عناوينه = لو ارحل منك للغربه بسافر من ظلامك وين
كفايه كل حلم يمر في رقادي تزورينه = كفايه وانا اللي من تفارقنا وانا ما غمضت لي عين
قبل يومين شفتك بالمنام وقمت من حينه = ونمت امس ورجع نفس المنام اللي قبل يومين


الذهب



يا كثر ما رافقت خلان واحباب = ويا كثر ما في شدتي هملوني
على كثر ما اعدهم ستر وحجاب = على كثر ما احتجتهم وتركوني
من صارت الخوه ثمن حفنة تراب = نفس الوجيه اللي نصوني نسوني
من غير ذكر عروق وفروق وانساب = كانوا ثلاثه والثلاثه جفوني
علمتهم شلون الاهداف تنصاب = ولما سواعدهم قوت صوبوني
عشاني اصغرهم عمر صاروا احزاب = عشاني اصدقهم قصيد اظلموني
اللي نجح اسمي زرع فيهم انياب = حتى النصيحه ما بغوا ينصحوني
دام العطايا عندهم دين واتعاب = والله لو اطلب ذنبهم ما عطوني
طالب نصيحه كني مطالب رقاب = وهي نصيحه كيف لو زوجوني
كنت اكتب لنفسي مشاريه وعتاب = ولا ادري ان اللي قروني .. قروني
تضاربت من دوني عقول والباب = واجد بغوا غيري وواجد بغوني
اقفل هدب تسهر على شعري اهداب = كني حبست رقادهم في جفوني
لو شفتهم واحد يشوفوني اسراب = من وين ما لدوا نظرهم لقوني
اثري وجودي بينهم محرق اعصاب = ومزعل بعضهم من بعض لو طروني
يا كبري بعيني وانا توني شاب = وهم كتاب الشعر حاربوني
حتى ولو يهوي على نجمي شهاب = يكفيني ان اسمي كبير بعيوني
جد قال ابوي انهبتهم قول ما هاب = لو يقدرونك قول ما تقدروني
ومدام قبري محتضن راس مرقاب = على كثر ما تقدرون ادفنوني
لو ماني بذيب نهشت جلدي ذياب = لو ما قدرت اثبت وجودي لغوني
لو ما سكنت وجيههم مت بغياب = لو ما عرفت امحي ورقهم محوني
ما جيت ابدبل كبدهم شعر وخطاب = لين دبلوا كبد اللي خلفوني
يا ويل وجهي كن للدمع مخلاب = ما جف ماه وما استحى من طعوني
كل ما طرا لي منظر مريب وارتاب = كان الوحيد اللي يحرك شجوني
قبلة صلاه وذكر وخشوع وكتاب = وامي على سجادة النور دوني
تدعي لي الله يفتح بوجهي ابواب = تتوسله بالشده يكون عوني
من كثر من خفاقها بالدعاء ذاب = صارت تحس ان زملاي كرهوني
بشرتها يماه معي ربع واصحاب = ماني لحالي واجد اللي يبوني
من يوم ما حاز قلمي كل الالقاب = قلطتهم في دفتري وحفظوني
الله وهبنيهم بني عم واجناب = من يوم جيت اعجبتهم وعجبوني
واعجابهم فيني ما هوب أية اعجاب = باسلوب بشرحي بطرحي بلوني
لو قلت عن نفسي بشر صرت كذاب = لو قلت دمي من ذهب صدقوني
لو بايدهم كان رزعوا دربي اعشاب = لو بكيفهم يتشبهون اشبهوني
من كثر من طبوعي قراب = حتى بلبسة شمغهم قلدوني
واجد دعوني واغلق من دوني الباب = وكثار في كيلهم ما بكوني
لو طالوا لهدمي مناسيب واطناب = كان وغلاتج من زمان هدموني
دام حطو فيني عيوب واسباب = جنبت عنهم مثل ما جنبوني
اصلا لو بقوتي شي ينعاب = ذبحت نفسي قبل لا يذبحوني
انا يدي لو ما كستمتني ثياب = نذراً علي لاقطع يدي من متوني
مو عيب اجي مدعو ولا اشوف ترحاب = العيب لو اني رجعت ان دعوني
ما دمت اجي ولا يحسبون لي حساب = حرمت اروح اذا يبوني يجوني


صـح الـنـوم



تعودنا على حمل الجمايل والزعل واللوم = ولا نرفض عتب غالي ولا نزعل من جداله
تمنينا نحوز اغلى مكانه في وجيه القوم = ونعيش الخوه بوقت يضد رجاله .. رجاله
تعلمنا من الدنيا وزدنا للعلوم علوم = وسقنا للدروب قلوب رجليه وخياله
وقفنا للزمن وقفة شجاعه والقروم قروم = الين صار واحدنا بديل اقواله افعاله
اليما انه خذا ياخذ مثل ما ياخذ المحروم = واليما انه عطا يعطي ولو من لقمة عياله
ولا بتنا ولو باتت رحايلنا بدون عزوم = نساوم للفخر بأرضه ولو بأي من اشكاله
ولا عفنا ولو شفنا على باب النهار سموم = ولا خفنا ولو طفنا بمخراجه ومدخاله
واذا شفنا العنب بأقسى عناقيد الشجر ملموم = نهز غصون عنقوده واذا ما طاح نرقى له
نصبر بعضنا بالجذب الابيض والهدف معدوم = ونقول انا وصلنا له ولو انا ما وصلنا له
وانا واحد من اصغرهم طموح وللطموح رسوم = على وجهي مثل قولة بغى شي ولا ناله
عطيت وما رضيت آخذ من سلوم البخيل سلوم = ولا عمري رضيت اقعد على قلب العرب عاله
ولا ارضى بالفخر فزعة جواسيس وكلام رخوم = ولا عمري حنيت الوجه بعد المجد لحثاله
غناي الله وانا رجلا عزيز مقدر محشوم = قنوع بالقدر وان قلت فال الله ولا فاله
بسيط يرمي حموله على متن الجبال هموم = بوقت للأسف عيت تطيق همومه جباله
بوقت نزل خشوم ورفع من رداه خشوم = وخلا قيمة الرجال بين الناس برياله
صحيت وقلت للنايم بعد ما قام صح النوم = زمانك ما عطاك الا صور وحطام تمثاله
سنين اطالع البارق واقول ان المطر محتوم = وهو ما مد لي كفه وانا ما طلت هماله
ارد اجذب على نفسي واقول ان النخل مفطوم = وهو ما بالنخل عدق عطش ما ذاق شلاله
وانا ما بي من البارق هماليل ومطر وغيوم = ولو ذقت العطش بعيون برقيه ورحاله
تعلمت الصبر من كنت طفلا بالمهد مزموم = الين صرت رجلا لانتخو به طوح عقاله
وانا ما احلف بعد عمر طويل بدفنة المرحوم = اقول الله ولا غير الله الرحمن نلجا له
ومثل ما بالمطر خوه ليما هل كوم وكوم = انا قلبي بعد يقدر يدك البيد بلحاله
واذا اسمي وصل للدنيا قبل لا القى الحياه بيوم = ابتركها وانا اسمي يضرب التاريخ بأمثاله
واذا ربعي وهم ربعي تناسوا حقي المهضوم = بعيش اشره على قلبي قبل لا ارثي على حاله
واذا كفي طعن كفي براس الخنجر المسموم = بعرف ان النصيب اقرب من الرجال لظلاله
مدام ان الزمن خلا الشجاع بوقتنا مهزوم = اجل خلوا ضعيف النفس يكسر شره اشوا له


تزعلين وتقعدين



عافت الشمس المدينه واعلنت وقت الزوال = رغبة للنوم منها مع عيون الناعسين
ابعدت من يوم شافت بالسما ضي الهلال = كنها كانت تهزا بالهلال وتستهين
كفكفت صبح التلاقي من ورا روس الجبال = واستخارتني وراحت وابعدت عن كل عين
وانتي اخطيتي خطاها وانعزلتي بالوصال = ولا رحلتي من سكات ولا وعدتيني تجين
عشت عمري بالمحبه في سبيل الاحتمال = وانتي تعيشين عمرك تفرحين وتجرحين
من غرورك في جمالك ما عطيتيني مجال = وادري انك تفهميني لو بغيتي تفهمين
كيف اشوف الشمس تشرق بالسما وانتي ظلال = ومن يعيش بوسط غاراً للذياب الجايعين
كنت احسب الكره زايل والجفا لو طال زال = ولا بديتي بالغرام وما بقى فيني حنين
اشهد اني ما خطيت ولا نويت الانعزال = وما خدعتك في غرامي لين شفتك تخدعين
اصدقي بالوعد مره لي ولو فيها سؤال = من عرفتك ما اذكر انك توعدين وتصدقين
كنت اشوفك من عيونك تامرين اقوى الرجال = والله اني قبل اعرفك ما هقيتك تخضعين
كنت اشوفك تبعدين وقلت من باب الدلال = وان بعدتي عن عيوني قلت باجر ترجعين
كنتي اكثر في عيوني من عدد وبل الخيال = وين انا ما ألد وجهي كنت اشوفك تضحكين
وان بغيت اصد عنك من يمين ومن شمال = ما قوت عيني تتلفت لا شمال ولا يمين
عاشقاً والعشق بلوه واشهد ان الحال حال = ولا تركتي رحمة الله ولا عرفتي ترحمين
وادري انك في غرامي للأسف نلتي منال = افترقنا في دقايق والسبب لعنة لعين
حبك اشبه في غرامي بالوصال .. الانفصال = ويلعب الخفاق لعبة كبرياء الخاضعين
بالهوا ما هي غريبه نكبة عيال الحلال = ولاني اول من يصون ولا انتي آخر من يهين
الصداقه في عيون الناس ملفى للعدال = وان كان ردت للصراحه كل ابونا مذنبين
والمحبه شبه زالت والصداقه لا تزال = بس اببقى في عيونج حامد اللي تعرفين
علميها يا قصيده واضربي فيني مثال = وعرفيها بالبداوه في طباع الأولين
عليمها كيف نصنع صبرنا والاحتمال = وعليمها كيف نفلح في العمل دنيا ودين
وعلميها في سوالف حلنا والارتحال = وعلميها كيف نظهر جورنا للجايرين
عليمها يا دقايق علميها يا ليال = وعليمها يا عصور وعلميها يا سنين
ان عشقنا ما بغينا غير عشقا بالحلال = وان نوينا ما لفينا كود ناساً طيبين
كاملين في عطانا بس لله الكمال = والرجل فينا غرامه لو يعين ويستعين
بدوياً ما يقوده للردى شد الحبال = يعسف اليد الشحيحه للعطا حتى تلين
همنا فعل الرجوله ورمزنا لبس العقال = وانتي المكياج كله صار في وجهك سجين
عندج المكياج موضه تحسبين انه جمال = صار همك في حياتك تكشخين وتطلعين
والا انا قلبي بقى لي بالمحبه راس مال = والله اللي مبتليني بالهوى والله يعين
ان بغيت اعشق ابلقى كثر حبات الرمال = لكن انتي لو بغيتي صعب مثلي تعشقين
قلت لك كل الصراحه واختم اطراف الجدال = وان زعلتي من كلامي .. تزعلين وتقعدين


الـثـريـا



ليه تطعني وانا ميت بليا = ما كفاك اللي حصل لي قبل ساعه
كن بين همومي وبينك حميا = جيتكم واحد جيتوني جماعه
انت منا والمصايب منيا = كلكم ضدي ترا ما هي شجاعه
ما ابشع من جروح طعنات القفيا = غير سكيناً تصيب بهالبشاعه
لا تتوب ولا تذوب ولا تريا = جرحها جرح وفضاعتها فضاعه
ترتوي من فيض دمي وتتفيا = وصار قلبي مثل اخوها بالرضاعه
وانت ليلاً لو ضويتها ما يضيا = ضعت فيه وشفت نفسي في ضياعه
اتهيا وين ما شفته تهيا = وارسي بمرساه وشراعي شراعه
من عرفته والمحيا في المحيا = وما يروح الا ذراعي في ذراعه
ان رضيت ارضيه وان عيت عيا = وان طلبني قلت له سمعاً وطاعه
ما عشقت من النجوم الا الثريا = وما ملكت من الكنوز الا القناعه
وانت وجيوش الموادع والجفيا = كيف اوقف ضدكم وانتم جماعه
لو بجيكم بالشجاعه والحميا = البلى ان الكثره تغلب الجماعه


غـرام احـبـاب



على ذاك الطريق اللي يسمونه غرام احباب = وطت رجلي على دربه ولا ادري وش نوا فيني
تبعته لآخر دروبه الين القمر قد غاب = تعب قلبي ولا تعبت مسافات توديني
لقيت الليله الجردا هدب ظل وسما واعشاب = بعد ذاك الظلام اللي يتوهني عناويني
صدفتك معجبه فيني وياليت الغرام اعجاب = وتراك انتي الهنوف اللي هقيتك تستحقيني
عطيتك هشق من قلبي وسلمت لغلاك رقاب = وغيرك يحترق قلبه ولا يقدر يحاكيني
انا قبلك صدفت عيون لكن ويش جاب لجاب = ترا كل العيون اللي لقتني ما تكفيني
رماني حظي العاثر عليك وجيت لك طلاب = ولا انتي اللي عشقتيني ولا انتي اللي عتقتيني
تعالي وارحمي ذاك الخفوق المولع المرتاب = مهوب لجلي عشان الله يجازيك ويجازيني
تعدي في سما عشقي ولو عشقي خراب اصحاب = وصوني في الهوا نفسك قبل انتي تصونيني
وشيليني على متنك خفوق بارياً منصاب = ومن فوق الغرام العذب شيليني وحطيني
وليمنك هقيتيني شجاع وما يطيق يهاب = انا لك بالهوا والله مثل ماانتي هقيتيني
انا ما امشي ورا غيرك ولو انه يطق الباب = وترا عيباً علي اطعن ولو كثرت سكاكيني
زهوداً ما يطيق الدم لا دايم ولا طلاب = شجاع وعارف نفسي واظن انك تعرفيني
غيوراً ما عرفت اضحك مع الغدر ببرود اعصاب = ابيع عيوني الثنتين قبل انك تخونيني
واذا شد الغرام احط قلبي بين ناب وناب = الفرقة تكسر ظلوعي ولا عشقاً يوطيني
انا رجلاً ولي غيره واذا شفت الهوا كذاب = تثور في قلبي الفزعه ولا تهدا شياطيني
سؤالك لو يزعزع بي كياني ما قبلت عتاب = اجي لك واسألك نفس السؤال اللي سألتيني
عن العشق القديم ابواب وتقفيها كثير ابواب = بعد ذاك الحبيب اللي خدعني وانخدع فيني
ابي عشق تحسب له كل نظرات العيون حساب = وابي قلباً على قلبي وابي ديناً على ديني
وابي كلمة عهد توفي ولا تخلف بدون اسباب = وابي منك قبل لا انتي تصديني توديني
وابي درباً على العذال صعب ومتعب وغلاب = وابي نفس الطريق الصعب يبعدهم ويدنيني
ترا لو للقلوب عيون ودموع العيون اهداب = حشى ما تنزل الدمعه لغيرك لو تركتيني
انا اول من عرف قدرك وانا توني صغير وشاب = وابي منك مدام انك عرفتيني تحبيني
مدام اني لقيتك في طريق اسمه غرام احباب = دخيل الله وبعد الله دخيلك لا تخليني
مدام ان كل من يحيى على وجه التراب تراب = عسى تنساني الدنيا مدام انتي ذكرتيني


حـد عـلـمـي



حد علمي بالغلا يوم كنت اسوا كثير = يوم كانت ضحكتي طبع وعنادي سمه
وحد علمي بالعنا يوم خفاقي ضرير = قبل اهدم العشق وابنيه وارجع واهدمه
وحد علمي بالبكا يوم لي قلب وضمير = قبل اشوف المسلم يموت بأيد المسلمه
ايه عدت من يدي بس ما عدت بخير = ليلة عيت تجيني وجتني مظلمه
من عرفت احساسها كن في قلبي نذير = والنهار المكتأب باين من مقدمه
ليلة حسيتها ما تجور ولا تجير = مثل طفلاً ما حقرته وعيت احشمه
واصبحت مثل شعره واقسمت ظهر البعير = وابتدا في موتها الجرح من حيث ختمه
صار لي في العشق ما لا هقيت انه يصير = ان ظلمت بعشرة انسان ما كنت اظلمه
العشير اللي تبرا من ظلوع العشير = الحلا عزز خطاياه والحظ خدمه
لا تبسم يكسر النور فعيون البصير = وكن شمس المغربيه تبات في مبسمه
معتدل في قامته لا طويل ولا قصير = ممتلي بالزين من معصمه لي معصمه
فيه بألوان الهدب لون غير ولون غير = مثل ما للرمش بالعين قصه مبهمه
كنها نكس البيارق على شط وغدير = ومثل لملمة الشتات بشتات اللملمه
في سواد مجدل ما يثور الا يثير = كنه اللي ينهم الريح ثمن تنهمه
ما تجمع لين قيد حريراً مع حرير = في ظلام علم الليل ما لم يعلمه
ما هقيت ان الهدب صلب واجفانه تغير = لين سلهم لعن ابو جد ذيك السلهمه
ما عتقني لين ساق البشاير للبشير = يوم صد وجاه قلبي بشحمه ولحمه
والله انه حط قلبي تحت رحمة شطير = في يديه وكل ما اراد يقسمه قسمه
لو صحيح ان الحبيبين يجمعهم مصير = كان نفس اللي حرمني من النوم حرمه
والله ان مروتي ولعة فيني سعير = يوم شفته تل قلبي وداسه بقدمه
ما رحم زهرة شبابي وانا توني صغير = لين ضيق خاطري ضيق الله نسمه
ايه عدت من يدي بس ما عدت بخير = ليلة عيت تجي بس جتني مظلمه
حد علمي في عناها عذاب وزمهرير = يوم قمت توحي بالاضلاع صوت وهمهمه
وحد علمي في الرجا من نصير ليا نصير = يوم شفت النفس تذبح وهي مستسلمه
وحد علمي بالبكا يوم لي قلب وضمير = قبل اشوف المسلم يموت بأيد المسلمه


مـالا يـفـعـلـون



ما بقى الا سود الايام تحرمك الرقاد = كيف الاوهام اتجرأ تسريك مغبون
من متى تجزع من الدمع وتخاف البعاد = من متى تقفي بك ظنون وتجيبك ظنون
صرت تاخذ كذبتي صدق ومزاحي وكاد = لو بقول اني بخونك تحسب اني بخون
ماتعرف ان كل شاعر يهيم بكل واد = وانهم دايم يقولون مالا يفعلون
ابك انا لاقلت ابنساك وانكرت الوداد = والله اني مانسيتك ولاهم يحزنون
من جزع من صفعة الشمس يطمع بالبراد = ومن فقد وجهاته الخمس يلقى بك ركون
اعتبرها هفوة انسان أو كبوة جواد = لو بتسمح فانت غالي ولو تجرح تمون
عـد صداتك مروة وطعناتك ضماد = خلهن لاراحن طعون ولا ردن طعون
خنجرك يستاهل الطعن ومتوني شداد = ومنك يازين الخناجر ويا بخت المتون
ردلي حنية المزح باحساس الجماد = خلنا واحد يجي صلب والثاني حنون
موت فـيني واندفن فيك بثياب الحداد = وان حييت أموت لرضاك واحيا بك بهون
مره ارقد بالكفن وانت ترقد بالمهاد = ومرة ارقد بالمهد وانت ترقد بالكفـون
ادري ان شـجونك شجون وعنادك عناد = والبلى ان عنادك عناد وشجونك شجون
ربك اللي سخرك لي تقود وما تقاد = والله الخالق ولله في خلقه شـؤون
ازرع ضلوعي من رضاك وابشر بالحصاد = لعن ابو من جيت ترضيه وترد محزون
بس تسـوى لك بلد قول تسوى لك بلاد = انت كل العالم بكون ولحالك بكون
مابعد محبتك حب ومرادك مراد = غير كونك سيد حشاي تدري من تكون
نعمتين اختصوا الخلق من جود الجواد = كافل الأرزاق من حيث مالا تعلمون
البنون ونعمة المال بعيون العباد = زينة الدنيا بلا شك في كل العيون
مثل زينة دنيتي بس عندي شي زاد = من عرفتك صاروا المال وانتا والبنون
انتشي بك نشوة التيه لعـناق الرشاد = وافزع الك فزعة القرم لشهاب الزبون
واحصنك تحصين الأرزاق عن درب الفساد = واعشقك عشق المظاليم لفراق السجون
لو تزيد الشوق جمرة تحولني رماد = لو يزيد العشق شعرة بوصل للجنون
خل هقواتك كبيرة ونظراتك بعاد = كانك انت بكبرك تهون من اللي ما يهون
ازعلك وارهن حياتي تحت رحمة زناد = تهبى لا والله الا انت والموت تهبون
عاد اذا ما ارضاك هـرجي ولا اللي قـلت فاد = اننا لله وانا اليه راجعون
وانـت باكر بتعرف على ناس جداد = والكلام يجيك من كل شكل وكل لون
لاتحسب ان كل كلمة بتسمعها وكاد = ولا تصدق هرج شاعر وتخدعك الظنون
دايم اعرف كل شاعر يهـيم بكل واد = وانهم دايم يقولون ما لا يفعلون
حتى انا اللي قلت اعشقك وما اطيق البعاد = يمكن اطلع ماعشقتك ولا هم يحزنون


أول الغيث ( للشيخ جابر آل صباح )



بسم الله اكبر وأول الغيث فرسان = جادت غيومه وانبنى السور من طين
كن الثرى تنبت مباني وجدران = وكن السما تمطر شيوخ وسلاطين
نونا ًسكبه الله على قصر دسمان = وامطرت يا غيث الضعاف المساكين
يا شيخ يا جابر يا تلايل كحيلان = انا اشهد ان سواتك قليلين
اقولها كلمه ولا اني بندمان = لا عودت لم الرجال الميامين
سافرت بلدان وتعديت بلدان = ومروا على عيني نشامي كثيرين
على كثر ما شفت بالناس شجعان = ما شفت مثل الشيخ جابر لهالحين
الله جمع طيبة اهل الأرض بأنسان = قرما فطره الله على العقل والدين
سلطان لكنه ما هو بأي سلطان = واحد ويسوى في نظرنا ملايين
يا شيخ طيبك مرهق عقول واذهان = نظرة طموحك تتعب العقل والعين
مدة يدينك طالت الأنس والجان = واعمال خيرك شيبة بالشياطين
من شبه اسياد العرب فيك غلطان = انت الوحيد اللي قلبت الموازين
والله لو امدح فزعة فلان وفلان = فزعتك وين وفزعة ربيعهم وين
الفرق واضح والرجاجيل شتان = والناس صارت تعرف الزين والشين
لو عند حكام العرب كثرك ايمان = ما كان ضاعت من يدينا فلسطين
يا ذرعنا اللي ما تزعزع ولا لان = يا سيف عدلاً سله الوقت لسنين
يا فزعة المبلي لا جاك منهان = يا شوق تلعات الرقاب المزايين
من لا نظر في وجهك ما زان = ومن لا دعا لك ما عرف قيمتك زين
ومن لا تشرف بالحكي معك خسران = ومن لا وصلك وقبل يديك مسكين
لولاك ما كنا ولا مجدنا كان = ومن غير عدلك ما تدوم القوانين
المدح في غيرك من الناس نقصان = والخير من غيرك مثل مدة الدين
يا كويت تفداج الخراييط والاوطان = وتهون لأمجادج تواريخ وسنين
وترخص علشانج ثوابيت واكفان = ويحلى على رملج نزيف الشرايين
يا كويت حنا للشدايد والاحزان = جينا عشان نموت وانتي تعيشين
كرامتج تبقى وتحفظ وتنصان = وان ضاعت نفوس العرب ما تضيعين
الله خلقنا للعداوات عدوان = وصدورنا تبرى بطعن السكاكين
ولو ضرب حسادج يزعزع بالابدان = حنا بضربه نقسم الجمع نصفين
وان كانهم وسط الميادين قشران = حنا القشر فينا بليا ميادين
واذا الحميا فيهم حمية اخوان = حنا حيمتنا حمية مجانين
للهرج ميدان وللافعال ميدان = وللمجد درب وللشهامه عناوين
وللفخر ناس وللتورايخ بيبان = وللموت سوق وللتجارب عناوين
يا بو مبارك والله انك كحيلان = وانا اشهد اللي سواتك قليلين
مرت علي الطيبه اشكال والوان = وقابلت حكام وملوك وسلاطين
على كثر ما شفت حكام شجعان = ما شفت مثل الشيخ جابر لهالحين


الحكم حمله حمل ( للشيخ زايد رحمه الله )



الحكم حمله حمل واهواله اهوال = والذود عن مصالح الشعب كايد
ياليت كل شعوبنا قد الآمال = وياليت حكام العرب مثل زايد
الله خلق صرح البطوله للأبطال = وما للرياده عرش من غير رايد
عديت كلمة حق والحق ينقال = لا عودت يم الفعول الفرايد
خلوا سواليف الحزاوي والاطلال = واخذوا من الواثع علوم وكايد
الفعل والله فعل زايد لي قال = مهوب فعل متبعين الجرايد
اكرم من اللي يطعن البخل بريال = والهف من احساس الحطب بالوقايد
واصدق من الدمعه على خد الاطفال = واثبت من اسوار الحصون السدايد
فعله لحال وفعل خلق الله لحال = قايد ويحسب عن ثمانين قايد
الكامل الله بس هو كامل افعال = سموه زايد لأنه انسان زايد
رحمة من الله جت على شكل رجال = عضيد لكن عن جميع العضايد
لو ما القصيد تكتبه فخر وجلال = اجل من اللي تنكتب له قصايد
يا بعد عمر الشعب والجاه والمال = يا ثغر ربعك بالليال الشدايد
يا رهبة هزت سراجيف الانذال = يا شوق تلعات الرقاب الرغايد
بنيت جيل وصرت نبراس الاجيال = عدلاً على سبع الامارات سايد
رغم الكلل علمتنا نيل الآمال = ووحدتنا رغم اختلاف العقايد
لك صرح حافل بالمحبه ولا زال = وان بادت صروح الغلا ما انت بايد
لو بالأبوه كل ابونا لك عيال = ولو بالمروه كلنا لك سنايد
يا شيخ درع درعك ورجالك رجال = شعباً زرع لأرضى زعيمه شهايد
تعلموا من نخوته ضرب الامثال = وصارت لهم تصرفاته عوايد
ان قلت زايد .. زايد سلوم وخصال = وان قلت قايد عن ثمانين قايد
ما اقول طيبه لا حضر يعمل اعمال = ومحبته تجمع قلوب وبدايد
اقول لو الطيب مخلوق رجال = يحب الارض اللي تحت رجل زايد


الأولي والتالي



جا نهار ما رحمتني جيته وقدومه = شفت فيه الناس واجد واقفي قبالي
كنت احسب انها حقيقه والعرب ملمومه = وقمت افضفض عن همومي واشتكي غربالي
ويوم زال الحزن عني وانجلى بغيومه = واثر اني ما غير اسولف بالخلى بلحالي
من عذابي قمت اعزي قصة مرحومه = ولعت بأيدين خلي وانطفت بأهمالي
قصةً لدت عيون صويحبي من نومه = يوم شلت الموت بأيدي وابتلوا عذالي
ما رضيت اكسر غلاي وما قدرت ارومه = وعاذلي ما صد عني وما قوى منزالي
ابتليته لين جتني خنجراً مسمومه = وابتلاني لين جا بالأولي والتالي
والله انه ما عذلني لين شق هدومه = ولين خانتني عزومي وانكسر تنثالي
والا انا ما كنت ابين لامطرت ديمومه = بالمدامع من فراق المخلصين امثالي
كنت اوقف واتذكر نفحة اليشمومه = واذكر اني كنت غالي في عيون الغالي
واحد كانت نسايب سيرته بسمومه = وكان كل ما شاف ظلمي بالهوا يلجا لي
ذاك والله كل مرسل في حشاي سهومه = انتهى ليل السكينه وابتدا زلزالي
والله اني كل ما اسمع سيرته وعلومه = قمت اشوف الموت الاحمر واقف بظلالي
واشهد اني كل ما اسهى وافتكر برسومه = ما وعيت الله وانا ارمي غترتي وعقالي
ليت ربي يحتميه ويحرسه ويدومه = يومه اقرب من عروقي للجسد بوصالي
وليتني لما عرفته ما عرفت خصومه = وما وقعت بظلم ناساً ما وراهم والي
العذول اللي حرمني حاجةً مقسومه = ليه يحرمني قهوتي والدلال دلالي
وليه يسأل في غرامي وان بغيت اسومه = دام صار الجيب جيبي والريال ريالي
والله ان العشق شياً يستحق القومه = واشهد ان عيون خلي تستحق افعالي
يكفي انه لا نظر لي نظرةً محشومه = يرتحف كفي ويوقع من يدي فنجالي
وان لمحت بطرف عينه دمعةً مكتومه = جيت كلي من عذابي عالي متعالي
وان تبوسم لي بعينه والشفا مضمومه = والله اني مدري بعدها وش اللي يجرا لي
ليت يومي قبل يومه او معاه بيومه = وليت حاله غير حالي دام هذا حالي
ان غفيت بالليل جتني بالمنام حلومه = وان صحيت الصبح ناسي سيرته يطرا لي
والله ليبطي عيني تسهره وتقومه = ووالله ليبطي عذولي ما يدك حبالي
دامني لا زلت احبه واعشقه بهمومه = بذكره مع كل خطوطه حللت ترحالي
وبذكره مع كل ليله مظلمه مشأومه = نزلتني في حشاه ورفعت منزالي
وبذكره مع كل دمعه نوخت بكمومه = وحسستني بين قدري في غرامي عالي
وبذكره كل ما نسيته وان ذكرت سلومه = قمت اشوف الناس واجد واقفين قبالي
وان حسبت انها حقيقه والعرب ملمومه = ما تحكمت بسكوتي لين طال جدالي
يوم زال الحزن الحزن وانجلى بغيومه = واثر اني لا زلت اسولف بالخلى بلحالي


رد الـسـؤال



انتبهت لدمعها بالهدب والكحل سال = لين جفت عينها دمع والقاع ارتوى
وابتدت لحظة جفى وانتهت لحظة وصال = وانطفى نور السعاده واحسب انه ضوى
ما اكتفيت من الهوا والغرام اربع ليال = وقفت ايام التلاقي وجا وقت النوى
كنت ابسلى وابتسم والتفت عنها شمال = لا قويت الصد عنها ولا قلبي قوى
ما هقيت ان الهوى عذب قلوب الرجال = لين ضاع القلب مني وتفكيري سوى
رحت ادور دفوة الشمس ضيعت الظلال = جيت اطفي شعلة النار والقلب انكوى
ما هقيت ان السعاده خيالاً في خيال = تروي قلوب الحبايب وقلبي ما روى
كنت ابشتال الهم والهوى ثقل الجبال = وان تحملت الجبل ما تحملت الهوى
كنت ابسلى بالهوى والهوى صعب المنال = ما رضى لي حظي اللي طواني وانطوى
قلت لأفراحي تعالي ولا قالت تعال = والخفوق ان قلت ابقبل على صدي نوى
الله اكبر لا اشرقت شمس يتلاها زوال = كيف ابفرح في صباحاً مع الليل استوى
لا حصل بالحب قسمة ولا جالي مجال = غير اشوف معاند الجرح وعناد الدوى
شبت النيران وقفت وجا رد السؤال = ما تشب النار يا كود يوصلها


سـمـو الـمـجـد



جيت اسلم ما بقلبي لا طموح ولا تمني = الوكاد اني عانيت مودع تراب الكويت
ويشهد الله يوم جيتك يا طويل العمر كني = زاير الشعب السعودي في محله بيت .. بيت
قبل اشوفك من وصوفك غير ذكرك ما فتني = وبوجودك ومثل جودك لا سمعت ولا رأيت
جيت ابطوي لك مسافات الدروب اللي طوني = ما عنيت الا لوجهك بس كني ما عنيت
خطوتين من الكويت لبحر جده وجمعني = مع سموك يا سمو المجد يا فيصل وجيت
والشعر لو ما رهنته تحت كفينك رهني = لو للطيب مبدأ فانتا اول من بديت لو تحب اكتب كتبت لو تحب امحي محيت
وش بغيت آمر تمنى لا يغرك صغر سني = شايف نجوم الثريا جبتها لك لو بغيت
لو بعيش اعطي كفوفك مثل ما كفوفك عطني = لا تحسب اني بوفي لو عطيت ولو عطيت
اشهد اني ما وفيت ولو وفيت انا اشهد اني = اشهد إني مقصر واشهد اني ما وفيت
لأنك اغلى من عروقي والوريد اللي سكني = واعتزازك تاج يبقى فوق راسي ما حييت
لاختلف في شخص ظنك لازم اخلف فيه ظني = وان رويت الماي مثل ما اظمى لا ضميت
وان زعلت ازعل وبرضى لا رضى قلبك لأني = واجب ازعل لا زعلت وواجب ارضى لا رضيت
انت مثل البحر تعطي والعطا ثقل وتأني = بس هو يعطي وياخذ وانت عمرك ما خذيت
محتفظ بأسمى صفاتك ومتبنيها متبني = وامتداد الملك خالد معدن وصوره وصيت
كن الارض تقول يوم اقدام خلق الله وطني = بعد رسله والصحابه انت خير اللي وطيت
يا طويل العمر لولا المستحى بتمل مني = قالوا ان لم تستحي من شي فأفعل ما اشتهيت
والا انا لولا الملامه والنصيب اللي حظني = كان ما اسري من محلك لين ما اشوفك سريت
من كثر فرحي بشوفك من نشد وش صار عني = بس اسولف عن سموك صار كيت وصار كيت
لو ينال المرء ادراك المطالب بالتمني = كان اجل هموم قلبي تنتهي لو قلت ليت
مغترب جيت متعني لك ولاني بمتعني = وقتها كني رحلت من الكويت الى الكويت
بس والله يوم جيتك يا طويل العمر كني = زاير الشعب السعودي في محله بيت .. بيت


الليالي السرمديه



من عرفت العلم وانتي الليالي سرمديه = والوصول اغلى طموحات الفتى بأول شبابه
والمهابه ما تهادت غير لنفوساً رديه = ليت في قلب الليالي للفتى قدر ومهابه
دنياً تجمع صفاتين الخجل والعنجليه = كنها بنتاً يزود بحسنها ثقل وذرابه
يوم جتني تمتحني في زمان الجاهليه = جيتها رجلاً تحلى في تقاليد الصحابه
بالعطا تبخل علي وبالعذاب تموت فيّه = عشتها قلباً رحوم يكره الضيم ويهابه
بس ابدري وش نهاية وصلها وآخر هديه = هو صحيح ان القصايد للجريح اول عذابه
من عرف لك يا الليالي وانتي اكثر من هويه = من تلحف في ترابك مقتنع باللي جرا به
من قدر يفرظ طموحه في زمان المعمعيه = من من الناس يتجرأ يتركك وانتي ترابه
السؤال يعيد نفسه والاجابه مبدئيه = ليت والله ما تكوني مبدئيه يا اجابه
الرحوم يخون ناسه والخوي ينسى خويه = والقلوب اللي تخالط ودها صارت تشابه
والخلايق ما تسوي طيبها جود وحميه = كلنا نضحك بوجه مبستم للغدر نابه
لو يصير الموت راعي كل ابونا له رعيه = لا زعل نزعل ونرضى لا رضى حضرت جنابه
والله اني ما نويت افتح ملفات القضيه = لكن اني شفت شيً يفقد العاقل صوابه
يالحياه انتي غديتي والغرابيل اجوديه = كنك اللي ما يميز بالخطا غير ارتكابه
ما عطيتي غير جرح ولعن ابوها من عطيه = والله انك ما عطيتي خير للقلب وصوابه
خاينه ما انتي عزيزة خافقي يا الاجنبيه = جنبي عني واجنب عن مداهيل الغرابه
وباخذ بدرباً يردك للقاء روحه وجيه = يا يموت بدرب والا بدفن القلب بضبابه
وان ذبحتيني تمني رجعتي وابكي عليّه = لين تملين المحاجر بالبكا حزن وكآبه
وادفنيني بين ظلك والخيوط العسجديه = لو لقيتي بعد موتي واحد بنفس الصلابه
شاعراً قدم قصيده لأغلب ايامك ضحيه = بين ناساً ما يطيقون القرايه والكتابه
يا زماني لو بقى للشعر في صدري بقيه = بكتبه وارسم خيالي للورق وألوي سرابه
وكان ردت للعناد وعودت للمقدريه = والله اني ما اتنازل لين اعديه السحابه
يا زمان ممتلي به وابتلى فيني بليه = لاتلوم اللي يخونك كان له عقل ولبابه
بقفل القلب المشقي عن هبايبك العتيه = ودق بابه من بعدها لو قدرت تدق بابه
الحياه اللي تسمي لعبة الشاطر خطيه = ما تساوت في عيوني مع جناحين الذبابه
اذكر اني كنت عايش بالليالي الأوليه = واذكر اني كنت عايش بأحضان غابه
ما عرفت الا عباره مثلها مثل الوصيه = عيش عمرك ذيب تسلم من مخاليب الذيابه


السـبـع الـعـجـايـب



اسمعي والكل منا له هواه وله ميوله = لا تمسين بكلامك شعره برووس القرايب
ان حكيتي ما وفيتي وان تحديتي عجوله = تحسبين ان كل فعلاً تفعله يمناك صايب
تحسبين انك خذيتي في الحشى صوله وجوله = تحسبين اني ذكرتك مع نسانيس الهبايب
والله انك لو ذبحتي خافقي لألقاك حوله = عاشقاً تشقى بقلباً من طريق العشق هايب
كم رضيت اسكت عليك من القهر وانتي زعوله = خايف اضحك واستفزك واهجرك واعيش ذايب
ادعيت انك خجوله وادري ان ما انتي خجوله = وادري انك تخجلين الشمس من فوق السحايب
ما يحببني بقلبك يا الهنوف الا فضوله = وما ينسيني غرامك غير تكرار المصايب
عاشقة جيتي ورحتي يا الحبيبه يا العذوله = ما بنيتي لي طموح ولا تركتيها خرايب
تستبحين القلوب وتستحقين البطوله = واستحق اعيش بعدك تايب واموت تايب
يا كثر ما شال قلبي شياً اكبر من حموله = ولا عفيتي عن غلاه ولا بخل لك بالوهايب
كنه ارحم من همال المزن للزهر بذبوله = وانتي اقسى من سموم البيض وكفوف اللهايب
وانتي ادرا في غلاك بداخلي وش اللي يزوله = وادخلي دخله على الله واحفظي ذيك السبايب
ما خبرت اللحظه اللي حللت قربك تحوله = ولا هقيت اني بشدد للجفى درب وركايد
وما هقيت انك تحبين الزلل وانتي جفوله = وما هقيتك تكرهيني كثر حبك للطلايب
كن قلبي في وصالك وابلاً لحظه نزوله = وفي فراقك مثل دمعه تنحدر من عين شايب
كنت ابي وقفة حبيبه تنهض القلب بحموله = طموحاً بالحب وانتي عايبه والحظ عايب
كنت غصناً كل كفاً غير كفك ما يطوله = كنت درب ودمعتين وقلب وجروح عطايب
كنت ابيع العمر كله وارخصه عرضه وطوله = للعيون اللي هدبها ثامن السبع العجايب
بس ابرضي لك غرورك واكسر القلب بذهوله = وقتها ما كنت افكر صايباً لو كنت خايب
والرجل لو ما تحلى بالشهامه والرجوله = صدقيني صعب يقدر يملك قلوب الحبايب
صدقيني ما يوالف خافق البنت بسهوله = بالهوا يا بنت حواء غير طلاب النشايب
والسهر والعشق الاول والهوا واللي ينوله = شياً اقسى من همومك والعنا حاضر وغايب
والهموم اللي دعتني من بعد سن الطفوله = كلها من تحت راس العشق ملعون الصلايب


الـذيـب



انا قلبي على الفرقى نوا روحه بدون رجوع = مثل طير بلا سبق وبلا وكر وبلا راعي
تهيا للجفى خطوه يبي بقسى الطريق هجوع = يدور للعنا ملجا طريق قلوباً جزاعي
فديتك يالخفوق بحب وجرح وقطرتين دموع = قبل لا يجبرك خلك علي وتلوي ذراعي
تعنيت وسبقت الوقت ولا عشت الغرام اسبوع = انا ما ابي الدنيا هبوباً تطرح شراعي
لعبت بدوري العاشق وكنت تتابع المتبوع = تلعب عيني ادوار الرساله بأيدين الساعي
رقيت الحب من ساسه الى راسه ولع وخضوع = رجلا تصعد الهامه ورجلا تحتضن قاعي
عرفت ان الهوا ظالم مثل ظلم العطش والجوع = واظن اني يوم انا عاشق شبيه الغافي الواعي
غفيت بعشقي الخاين ووعيت بعمري المدفوع = واشوف القلب لأيامي غدا ناعي وانا ناعي
وانا بقبل على الفرقى وبضوي للظلام شموع = ولا لي بالشقى حاجه ولا به للسفر داعي
وببدي رحلة الفرقى وبرحل وانهي الموضوع = مدام ان العذول اللي لبس ثوبي مع قناعي
ابعرف يا ترى بعدي من اللي بيقطف المزروع = وانا مالي في هالدنيا سوا خلي ومرباعي
سطا ذيباً على المرعى وسلمت بخافقاً مفزوع = وفدوه لو يموت من القطيع ويسلم الراعي


عـشـاقه وجـمـهـوره



انا والليل والعبره وجرحاً وخاطر مكسور = ونفساً من هجير البعد والحرمان مقهوره
وقلباً ظامي لشوفه ولا يروي ظماه بحور = وعيناً تحتري لحظة غياب الطيف وحضوره
وناراً تطفي مره ومره تشتعل وتثور = واقول النار مقدوره وهي ما هي بمقدوره
حسبت الليل بغيابك يمرن اللي دهور = وكني شايل في قلبي بيال الوقت وشهوره
تصبرت وتقدرت وبنيت من الخيال قصور = الين ان الجفا شد الركايب وانتهى دوره
تحريتك على درب القصايد من ثلاث شهور = وحشى ما مات لك غصناً يشب الماي بجذوره
تخيرت الغرام وجيت لا راضي ولا مجبور = وجيتي تسبقين خطاك مرضيه ومجبوره
وانا ما كان لي رغبه ابين واكشف المستور = ولكن الغرام اكبر من الخفاق وشعوره
جمال وود وعيون ودلال وكبرياء شعور = وفتنه تخذل عيون النهار وينطفي نوره
والك في خافقي صوره تلاشت بين ظي ونور = واخاف اسكت من الفرحه وتنطق باسمك الصوره
عرفتك وانتهت رحلة قساوة دربي المهجور = والا يا جملة ايام الجفا والصد مشكوره
خذتني للجفى عزه واخذني للعناد غرور = واخاف اكون بعنادي حبيب ومات بغروره
واذا كانت مسافات الخيانه للغرام قبور = وش اللي يجبر العاشق يخون ويحفر قبوره
وش اللي يجبر الشاعر يدور للشعر جمهور = ما دام انتي محبينه وعشاقه وجمهوره


قـالـهـا حـامـد



تماديتي وانا مثلك تماديت بهجر وبعاد = وكلاً مثل عناده حفوقاً ثابتاً صامد
واذا عندك بعادي عيد ترا عندي جفاك اعياد = وعسى طول الجفى مني يلين قلبك الجامد
ابضحك بظهر البسمه ولو ان الجروح جداد = ترا قلب الحريقة ظو ولو وجه الحطب رامد
بكون اكبر من الغلطه وبعلن للهوا ميلاد = اذا كان الخطا منك مجرد ثورة الخامد
واذا كان الجفى منج مسافات وغلا وعناد = تراي اكبر من عنادك وقولي قالها حامد


قصيدة الأم



قصيدتي زاد في عيوني جمالها = واخذت انقي بالمعاني جزالها
اكتب معانيها من الشوق والغلا = لأمي وانا اصغر شاعراً من عيالها
كتبتها في غربتي يوم رحلتي = لما طرا لي بالسفر ما طرا لها
امي وانا بوصف لها زود حبها = وان ما حكيت لها قصيدي حكا لها
امي لها في الجوف والقلب منزله = مكانة ما كل محبوب نالها
اقرب من ظلالي وانا وسط غربتي = وانا تراي اقرب لها من ظلالها
ما شافت عيوني من الناس غيرها = ولا خلق رب الخلايق مثالها
اغلى بشر في جملة الناس كلهم = واكرم من يدين المزون وهمالها
اتبع رضاها وارتجي زود قربها = واللي طلبت من حياتي وصالها
الصدق مرساها والاشواق بحرها = والعطف واحساس الغلا راس مالها
اهيم فيها وابتسم يوم قلبها = يسأل وانا قلبي يرد سؤالها
وان طلبتني شي فزيت مندفع = اموت انا واحمل تعبها بدالها
اصبر على الدنيا والاحزان والتعب = واحمل على متني فطاحل جبالها
واسهر واعذب راحة القلب بالشقى = واعيش اعاني بس يرتاح بالها
تربية ابوي اللي على الطيب نذكره = اللي وهبني للحياه ومجالها
نور لي دروبي وانا طفل مبتدي = حتى تركني واحداً من رجالها
الوالدين اولى بالاحسان لأجلهم = واولى بتكريم النفوس وعدالها
اقولها وانا على الله متكل = والله عليم بقدرتي واحتمالها
يا كلمة اغلى من الناس كلهم = يا شمس في قلبي بعيد زوالها
يا فرحة تملي لي الكون بأكلمه = يا شجرة تكبر ويكبر ظلالها
تضحك لي الدنيا لا شفت زولها = مثل السما تزهى بطلة هلالها
والبعد عنها يا اهل العرف ما اقدره = لا شك ناري زايده باشتعالها
ما اعيش ببلاداً ولا اهيم بالرهى = ولا ابي عيوني كان ما هي بقبالها
ارضاً تدوس امي بالاقدام رملها = اموت فيها واندفن فترايها


الـجـريـمـه



يوم ثارت في جنوناً من جنون الجاهليه = عاتبتني لين شبت في شراييني لهبها
استفزتني وفزت وزعلت مني عليا = واستضاقت من كلامي يوم زعلني عتبها
من بعدها ما بقى لي فيه محاميها بقيه = اسدلت دمع المحاجر للبكى وانخت هدبها
والله اني ما نويت ابدي معها بالخطيه = بس هي اللي تعدت حدها لحظه غضبها
يمكن اني كنت قاسي بالعتب معها شويه = كثر ما كانت تتمنى راحتي واعشق تعبها
والله اني كنت اكابر بالعتب في حسن نيه = بس ابدري هو صحيح اني الوحيد اللي عجبها
جرحتني بالكلام وكبرت حيل القضيه = وخسرت بي كل عرقا من شراييني كسبها
والا هي ما كان فيها للموادع مقدريه = والجفى كانت تعافه بس مدري وش قلبها
ليتني ما رحت اقايس قيمتي عند بدويه = رجعت لي كل عرقاً حبها والا نهبها
وعلمتني كيف ابنجح وانتصر وابقى ضحيه = وعلمتني كيف قلبي لو غلبها ما غلبها
وعلمتني يوم صدت عنفوان الاجوديه = ما تلوح للمقفي لو سلبها ما سلبها
رابيه بين القبايل والعرب واهل الحميه = عاقله ما تبذل الا نخلة تعرف رطبها
ان تهادت ذكرتني في خفوق العامريه = وان تمادت تركب ابليس الرجيم وما ركبها
جفنها لا سلهمت به ما يطيق السامريه = تسحبه برضاه عينه وان سهت عينه سحبها
وان حكت تعطي مكانه للحروف الابجديه = كن كلمتها تتلفت للكلام اللي عقبها
والحروف ليا تعدت بالشفاه النرجسيه = كنها صارت قصيده بس ربي ما كتبها
وش بوصف من حلاها وش بخلي للبريه = ما بها بالحسن عيبا وكشفت الا حجبها
شعرها فيه الخوي اللي تبرى من خويه = والشفا لو تشرب الماء واختلط فيها شربها
كن في ضمة شفها جمرتين بنار حيه = كل من حس بدفاها واحترق صد وقربها
شفتها مثل الجريمه وابتليت بها بليه = غلطة جيت اتحاشى ظلمها قلت ارتكبها
كل شي شفت فيها فيه نبرة جاذبيه = موهبه من فضل ربي واشهد ان الله وهبها
كلها لله بلله فاتنه هالادميه = عاجبتني من بداية راسها لأسفل كعبها
لو تبادلني شعوري والهديه بالهديه = ما وفتني لو تبيع ثيبها واغلى ذهبها
هملتني والقلوب الجرهديه جرهديه = وحرمتني والمحبه نارها تأكل حطبها
والا انا ما كنت اكابر والليالي سرمديه = يمكن ان اللي غصبني للولع فيها غصبها
يا خفوقي ودي انك ما انت في حاجة وصيه = شف مكاني وانت تدري وين هي يمة عربها
رح لها وان كان فيها قلب يطمح في مجيه = شف طلبها في عروقه وان حصل تمم طلبها
وانشده وان قال عنها من هدر دمي بريه = قله ان اللي حصل لي بالمحبه من سببها
ولو يقول اني تعمدت الزعل لجل الاذيه = قله اني ما اتحمل بالعتب قلة ادبها
ولو يقول اني انا اللي كنت بادي بالخطيه = قل هي اللي تعدت حدها لحظة غضبها


من تحت لي تحت



لو تعرف الخطايا كيف كنت محروم = كان سود الليالي يوم طحت سمحت
ولو هموم المقارق مثل كل الهموم = ما تشوفون عيني بالدموع سبحت
ولو تحن المشاكل عقب حب الخشوم = كان حبيت خشم المشكله واستحت
بين صدة عزيز وكبرياء مهزوم = عين شحت علي وعيناً استسحمت
بس ما الله خلقني من بكاي معصوم = وادري ان المحاجر لو تفيض فضحت
والله اني على جرحي صبور وكتوم = بس الدموع لي روحت .. روحت
اعذلتني ظروفي وانهكتني عزوم = والوجيه حزنت لي والقلوب فرحت
والله ان الليالي ما تعرف السلوم = قلب جافي لقاه ووجه صافي باحت
راهنتني تبلل بالدموع الكموم = ويشهد الله عليها راهنت وربحت
احرمت نور عيني من غلا ريم قوم = بذرة وارتوتني واثمرت وطرحت
جادلاً دوم ما هي بمثلها كل يوم = استضاحت غموض وبالغموض وضحت
دورت بين قلبي والهدب درب نوم = وامرحت وين مدري المهم امرحت
تنحت اسمي بقلبا جيت فيه معزوم = واسمها بين جلدي والعظام انحت
مثل جفني لعيني للنعاس محكوم = كل ما نمت نامت .. كل ما اصحى صحت
ما تعارض كلام غير عند اللزوم = بس لا قمت اسولف واندمج سرحت
دايم ازعل عليها بس قلبي رحوم = وهي تموت في عذابي من تحت لي تحت
مثل وجه الصداقه في ثياب الخصوم = ان تطيبت طابت ان جرحت .. اجرحت
خصها الله بوصف من خيال معدوم = لا آذان سمعت به ولا عيون لمحت
كن ربي خلقها من بياض الغيوم = ومن كفوف السحابه بالورود لقحت
عن سواها فرقها بالقمر والنجوم = وكل عذرى تباها بالجمال نزحت
بالحلى هي كوم وباقي الناس كوم = كفة عادلوها بالبشر ورجحت
حسبي الله على اللي ما بغاها تدوم = من بعد كيف كانت شوف كيف اصبحت
لا تحقق وصال ولا فراق محتوم = خطةً قربتني للفشل ونجحت
لعنة العشق تبقى مثل ضرب السهوم = لو محى الوقت جرحه طعنته ما امحت
كيف ابنسى وانا اللي من جفاف لسموم = ما حشمت العيون ولا الدموع فلحت
كانها بالحميا كل ربعي قروم = لو يلدون لصعاب الظروف صلحت
اجزم ان كنت يا قلبي شجاع وجزوم = لد لعيون بنتاً لا التفت لفحت
من تهين البخيل الا يدين الخدوم = دام كف الخطايا بالجفى لوحت
نطح الباس باس ونطح اللوم لوم = ان تهدت تهد وصيح ان صيحت
يا تعيش بمعزه يا تموت محشوم = ودك ان الليالي لا فعلت مدحت
عمر ضعف الاراده ما يسر الرخوم = ضربة السيف لو بأيد الشجاع ذبحت

مشكور وبيض الله وجهك

بس ياليت التنسيق ما تستخدم فيه العمودين

المتداخل أفضل للمواضيع الكبيرة عشان ما يسوي تمدد للصفحة

لك

تحياااااااااااااااتي

سلمــــــــــــــــــــــت ..... وسلــــــــــــــــــــم نقلــــــــــــــــــك

للــــــــــــــــديوااااان ....


لـــــــــــــــــــك جـــــــــــــــل التحــــــــــــــــــايــــــــــــــا وأعــــذبهـــــــــــــــــــا .......

انـــورت صــفـــحـــتــي بــردكــي الــجــمــيـــل

ومــــروووووووركـــي الـــعــــذب

لــكـــي تــحــيــاتـــي الــعــطـــرة

مشكوووووور أخوي على الديواان الجميل لي الشاعر المعروووووف



تــــــقـــــــ مروووووووووووووووووووووري ــــــــبـــــــل



صقـر عتيبـة

مــشـكـــووووووووووووور عــلــى الــمــروووووووووور الــعـــذب

لك خــالــص الــتــحــيــة

الزعيم


الله يعطيك الف عافية على الديوان الجميل المميز وننتظر الجديد



لـــــــــــك تـــــــحـــــــيـــــــاااااااااااااااااااااااااا اااااااااااااااااتـــــــــي



أمير القوافل

مشكور والله يعطيك العافيه

مشكور يا الزعيم على الرغم من أني نصراوي مشكور من القلب :ts:

مشكور على النقل الراااائع

تسلم يمينك

تقبل تحياتي

°ˆ~*¤®§(*§*)§®¤*~ˆ°مشكور حـــــــــــــــــــــــــــــــــيل على النقل اللى مجتهد فيه
وانا من اشد المعجبين في قصايد حامد زيد الف الف شكر
مع خالص تحياتي°ˆ~*¤®§(*§*)§®¤*~ˆ°