لا أطيل عليكم
الأبيات تعبر عن حال بعض الناس
خلال السفر خص ليا لقي من يقول له أنت أمير
عاد وصدق أخونا في الله مثل ما أنا بعد صدقت إنه أمير وقلت :
حليت في دار بها يعبد القرش=أكثر من عبادة رفيع الجلالي
يتعاركون معارك الطير والوحش=نسوانهم ورجالهم والعيالي
طعامهم بصل على فول مع مش=ما يعرفون الكيف بصفر الدلالي
راع المحل يعزمك طمعان بالرش=فاتورتك تجيك برقم خيالي
ما تسمع الا أش من فش من تش=قليل من يعرف حرام وحلالي
يا طيبهم ياحلوهم ليه معرفش=يجوز جاني من طرفهم هبالي
من جالهم طفشان ما عاد يطفش=ينسى على ما قيل غبر الليالي
خص(ن)ليا شافوا قروشه تخرفش=اللي يطلعها من الصرف الآلي
يصير أمير(ن)لو عاده من الدبش=فارس زمانه والتوالي لوالي
يا مير كانك تقدر تهج فنحش=جنب عن دروب الخمل والخمالي
يا مير ليتك تسلم اليومه الفرش=أمارتك جات بجنيه وريالي
يا مير كم واحد(ن)عاد منغش=يصفق بكف كف يمنى بشمالي
منتف(ن)يا مير ومبرش برش=رامي ببشته والغتر والعقالي
يا مير حاسب قبل تصبح مكلبش=والا يبيعونك بسوق البغالي
إحسب حسابك قبل يا مير تبلش=ترى الأمارة ما تجي بالتسالي
دام الجنيه جنيه يا نفخ يا فش=وليا قضا قلبوا بوجهك نعالي
ما عاد تسوى عندهم حذوة الجحش=يا هم لالي عاد يا هم لالي
ليا خلص التنقيط أخذ من الحش=ما باقي الا يأخذون البدالي
حتى قبور أمواتهم طالها النبش=ما وفروا حتى القبور الخوالي
خلك حريص إن كان ودك تفرفش=لا تشتري إرخيص تحسبه غالي
البيت بيتك بس حاسب على العفش=اللي من أيام الفراعين بالي
البيت بيتك دام جيبك يطرطش=وليا خلصت البيت بين الزبالي
ما قلتها تنكيت والا تحرش=الا حقيقة ما تعاوز جدالي
شوفة عيوني ما سمعت المربش=اللي يزيدون الحكي والكيالي
دونتها واللي يدردش يدردش=ماني على باله ولا هو ببالي
صحيح فيه أخيار في كومة القش=لكن طعم المر غالب لحالي
اللي من أول فوق عظمه غدا هش=واللي من أول تحت يرقى علالي
باطن كلامي صدق في ظاهره دش=والمعذرة من طيبين الرجالي
يمكن لعل تشاهد أعين(ن)عمش=جواب يطرح قبل طرح السؤالي
هذي بعض صفات من يعبد القرش=ليا جا لها سيرة وذكر ومجالي