أنا على شأن الوفا قلت أصارحك=هذا جوابي كان ينفع جوابي
منته غشيم أكيد تتبع مصالحك=لكن حاسب قبل يوم الحساب(ي)
خاف الكريم اللي مراقب جوارحك=ما تفعله محفوظ لك بالكتاب(ي)
لو كنت جاهل كان لك حق ننصحك=ونقول لك وين الخطأ والصواب(ي)
لكن سو اللي تشوفه يريحك=ما عاد ينفع معك لوم وعتاب(ي)
هذي طبيعة فيك هذي ملامحك=من يوم كنت صغير بوقت الشباب(ي)
قصدي دواك ولا مرادي أجرحك=لاجل(ن)جرح ما تعالج ما طاب(ي)
أخاف لا تُكـسر ليا جيت أصلحك=اللي يشيب بشيء بالشيء شاب(ي)
ماني بلا ذمة على شأن أمدحك=مدح(ن)بلا واقع شبيه السراب(ي)
حتى ولو إنه بلحظات يفرحك=منته محصل منه زاد وشراب(ي)
ولاني على الزلات لا غبت بفضحك=عيب(ن)على مثلي حكي بالغياب(ي)
يخطر علي أحيان أقنع وأسرحك=وأرتاح من كثر المجي والذهاب(ي)
بين الرجا واليأس ببقى مطلطحك=بعلقك بين الثرا والسحاب(ي)
خل الليالي والعواصف تمرجحك=يمكن تعود بعدها للصواب(ي)