السلام عليكم ورحمة الله وبركاته
مساكم الله بكل خير .... وصبحكم الله بمثله
هذه خواطر أخر الليل ....بعد أن نامت أعين كثير من الخلق
واليكم الأبيات....علها تروق لكم
يهناك نومك يا بعد كل غالي=خل السهر لعيون ما تعشق النوم
حتى ولو مرت عليها ليالي=والعود صار من السهر شبه مسموم
النوم في غيبتك ماهو بحالي=الفكر ما يرتاح والقلب مهموم
وشلون برقد وأنت مشغل لبالي=أصدر الأوهام وأورد حلوم
طيفك يلاحقني وماثل قبالي=يجدد الأشواق ويبعثر هموم
ياما ترجاني وياما شكى لي=وأنا معه واصلت لليل باليوم
حتى غديت من السهر شبه بالي=ما كني الا هيكل(ن)فوقه هدوم
بين على وجهي شديد إعتلالي=واللي بقلبي صار بالوجه مرسوم
شوفي يكفي يا غلا عن سؤالي=ماني بموجود(ن)ولاني بمعدوم
بكمل المشوار ماني مبالي=ما دامني من شوفتك صرت محروم
بسهر وبسهر لين ياتي زوالي=وإن كان مت من السهر قول مرحوم