على بحر القصيد اللي يدفه موج عقبه موج=
رسى مركب قصيدى والبحر ما همني موجه=
مادام الراس راسي سج ياقلبٍ(ن)حمته العوج=
وغوص البحر بعد البحر وأغطس داخل لجوجه=
على صهوة جواد الفكر بتعب خيلي المسروج=
بمضمار القصيد الخيل ماني راحم سروجه=
لساني مثل حد السيف لا قاصر ولا معووج=
ولاني تابع اللي في قصيده لفه وعوجه=
على وضح النقا مافيه لا هفوة ولاش طعوج=
أعدل للقوافي والقصيد أزين مطعوجه=
تراقص لي بيوت الشعر رقصة فاتنه عمهوج=
صعيب القاف لامني عسفته فتح دروجه=
قصيدي من رصيدي ما يحوم حوله المرجوج=
بنوك الشعر ما ترخص لمرجوج(ن)ومرجوجه=
معاني سامية العرف في طياتها ممزوج=
وروحي بالقصايد بينه بالدم ممزوجه=
قصائد يعربية مابها ياجوج مع ماجوج=
بنات أفكاري اللي من صمميم الفكر منسوجه=
نقية ساسها معروف ما عرضتها للحوج=
هوازن أصلها ولسانها ما خالط الخوجه=
على بحر القيد اللي يدفه موج عقبه موج=
رسى مركب قصيدى والبحر ما همني موجه=