السلام عليكم ورحمة الله وبركاته
بدون مقدمات الأبيات أطرحها بين أيديكم
علها ترقى الى مستوى ذائقتكم
فديت الدمعة اللي طهرت قلبي من أدرانه=على خد الحبيبة سالت الدمعة على شاني
ليا شفت الدموع الغالية في محجر أعيانه=تجاوبها دموع ساخنة من محجر أعياني
عساني منحرم من لهفة المضنون وأشجانه=ليا منه شكى لي حرقته بالحال بكاني
وأنا لولا الغلا ما هلت دموعي على شانه=لكنه مالك(ن)روحي وحاكم كل وجداني
سكن بين الضلوع وهز عرش القلب وأركانه=غدا لي مثل نبض القلب أحسه جوف شرياني
فؤداي مخدعه والفكر مني باقي أوطانه=وروحي تحضنه في كل ذكر وكل نسياني
وهبته فكري المجنون وأنا عاشق جنانه=لقيته بلسم جروحي وكابح نزوة جناني
حبيب(ن)مختلف عن البشر ما بين أقرانه=عرف من وين يكتبني عرف من وين يقراني
ترفق بي ورفقه حل بالوجدان ثم زانه=ملكني بالأدب والذوق ماخذ كل تحناني
جمعني في كتاب وحطني نصه وعنوانه=وأنا بعد جمعته في كتاب وصار عنواني
كتاب(ن)غلفه مضنوني الغالي بتحنانه=على يده نسيت الهم زاحت كل أحزاني
حفظنا عشقنا المجنون نعرف كامل ألوانه=غرام(ن)ساتره ثوب الطهر عن كل نقصاني
يعاتبني على لحظة فراق ويشكي أحزانه=ليا منا تلاقينا مثل ما اوصيته أوصاني
فديت الدمعة اللي طهرت قلبي من أدرانه=على خد الحبيبة سالت الدمعة على شاني