هديتي لكم فمن يرد الجزية
واليكم الأبيات
بهون وسيلة صرت عاشق ومفتون=وأنا الذي ما كان سهل قيادي
صاحي لكني في مودتك مجنون=اليا ذكرتك صار في إرتعادي
أنسى هلي وأذكرك والله بالعون=منحاز لك باللهف معرف حيادي
ملكتني بالحسن والذوق وشلون=سحرتني والأمر ماهو بعادي
كل شيء أشوفه فيك بحيل مزيون=حتى المخاصم والكبر والعنادي
تهون روحي وأنت والله ما تهون=ما أحب شيء يزعلك لو عادي
أخذ حياتي كلها وأنت ممنون=و إن كان تبغاني مفادي بفادي
والا تعال وداوني كلي طعون=داو الجروح الأوله والجدادي
ملكتك الإحساس والعال والدون=يا وردة مكنونة في فؤادي
كتبت فيك من القصائد مية لون=حتى تعب حرفي وخلص مدادي
غطيتكك بالرمش وفراشك النون=و زرعت لك بالقلب فل وكادي
حبك بروحي داخل القلب مصيون=بعيد ما تلحقه طول الأيادي
ما صار لي قبلك من الناس مضنون=أنت الهوى والشوق غاية مرادي
صرت بغرامك مثل ما قيل مرهون=في كل شيء القاك رايح وغادي
بهون وسيلة صرت عاشق ومفتون=وأنا الذي ما كان سهل قيادي