السلام عليكم ورحمة الله وبركاته
كما عودناكم دائما نتواصل معكم بدون فاصل
واليكم الأبيات بدون مقدمات
طازجة من الفرن للمائدة
لا طازج الا الطازج
ياهبوب الشوق مري بالقطيف=سلمي لي فوق ملهوف الحشا
بلغيه بلهف ملهوف المصيف=وذكريه بحب بالخافق نشا
وإن نشدك كيف حاله كيف كيف=قولي المسكين يصحي ويغشا
ماش سيرة في حياته يالطيف=غير ذكرك لن قعد والا مشا
العقل تعبان والهيكل نحيف=والعيون من السهر ما ترمشا
ما بقا له بالعرب غيرك وليف=يمرهم ما كنه الا أعمشا
يشكي الأحوال من بعد مخيف=والزمن غدار قام وكلبشا
الربيع أقفا وجا بعده خريف=صارت الأشجار قش يقشقشا
وجه الدعوة بلطف(ن)ياظريف=لاأحد يدري في سموعه وشوشا
قلها يامرحبا لن حل ضيف=الدروب مبرشه ومفرشا
لا تخبر لا سليم ولا كفيف=كل سر يشين لامنه فشا
ثم عود يا هوا يمي نكيف=هات لي مردودها لا تبلشا
عل عيني تهتني عقب الرفيف=نقهر العذال ونكيد الوشا
الهوى بقلوبنا حب عفيف=ما تكدره الدلي والا رشا
النظيف يعيش ويودع نظيف=ما نقش غيره ولا أحد ينقشا
ذا كلام صرفه شاعر عريف=طوع القيفان منها ما خشا
من بنات الفكر ماهي من رصيف=ما شراها بالثمن و مغششا
يا هبوب الشرق مري بالقطيف=ثم هاتي رد ملهوف الحشا