يابن عبيان البدو من دهرها=قامت تطب السوق وتبيع بنجاش
الوقت جاير والعرب من قهرها=حلالهم جابوه من غير حواش
وأحيان أقول البدو زايد بطرها=تبا تبيع البل من شان فشفاش
وأحيان أقول البدو ربك جبرها=القطر وقف والزمل مات ما عاش
زمولهم معروفة(ن)من جررها=واللي تدوس الشوك تحتاج منقاش
والا العيون اللي حديد(ن)نظرها=ماهي بحاجة يافتى نقش نقاش
والأرض ما جفت حقيق(ن)مطرها=السيل سال وشال من دربه قشاش
واللي يخلي زرعته ما سبرها=يطب فيها السيل وتظلي دشاش
والليلة القمرا يبين قمرها=يشع نوره طول ليله ليا أغباش
والصبر زين ولا تعجل قدرها=بكره يبان العلم والظفر واللاش
ليا راحت العربان تنقل سيرها=فلان هاش وصاحبه ذل ما هاش
قامت تشب النار ويقدح شررها=بالسيف والبندق وخنجر ورشاش
الاد ثابت عزوة من ظفرها=أخذوا زمام العلم ومدوا فراش
وليمة(ن)وثبيت مدت سفرها=جابت صحون الحول ماجابت كراش
واللي تسده غيبته ما حضرها=تلمع عيونه كنها لمعة فلاش
لو طب بالميدان وفتش صررها=أما طلع مديون والا ربح كاش
عند اللزوم قروم ترمي غترها=تنحر سمان البل وسمان الأكباش
الله يرحم عودنا اللي ذخرها=أهل الوجيه البيض وأبيض من الشاش
تحمي مواقفها وتحمي ديرها=الوبل عقب سيل ما يسيل رشاش