يا مرحبا يا من لها القلب مشتاق=شوق الصحاري مقبلات السحايب
إن غبت عني خاطري بالبعد ضاق=وليا حضرت أنسى عزيز الحبايب
كم ليلة(ن)الفكر مشغول ما راق=لأجلن قلبي من مودتك ذايب
شوقتني للحب والشوق خناق=ما جبت من بعده يكود المصايب
حملتني حمل(ن)من الصبر ميطاق=لو قلت صائب طحت ماني بصايب
سرقتني بالود والود سراق=اللي يصيبه عاد مهو بطايب
أنا ورا الأحلام بلحيل منساق=أطرد ورا طيفك ولاني بآيب
ترى لشوفك يريش العين تواق=حلم(ن)يراودني وفيه العجايب
متى يجي يوم(ن)تبادلني إعناق=وتموت والا أموت ماني بتايب
وأنا وطيفك والزمن بيننا سباق=وأنا محب أكون مهزوم خايب
كل الذي أعرفه من شوق حراق=جلب على روحي جميع السبايب
أحس في قلبي من اللهف دقاق=لا من ذكرتك يا حسين الترايب
طيفك ليا منه لما مثل براق=يرعد خفوقي والتنهد هبايب
بعد ملكت الفكر خلك بالأعماق=مرضى بعدك(ي)للمعاليق نايب
هذا غرامي بكتبه فوق الأوراق=والخوف من حرقته تصبح شبايب
ما يعرف الأشواق يكود من ذاق=غدا للوعات المحبة نهايب
بكتب قصيدي فيك ما دامني باق=حتى يحطون النثل والنصايب
بحط من شعري على جيدك أطواق=يم العيون النجل وأم الذوايب
ما همني إن لاق وإن كان ما لاق=ما دامني أهواك ماني بسايب
هذا قراري وأنت للشعر ذواق=والشعر مرسال الهوا والرغايب
أنا أجتهد والله مقسم للأرزاق=ولاني بضامن شي بالغيب غايب
لكن فيني خوف من ساعة فراق=يصبح بعدها أسود الشعر شايب