السلام عليكم ورحمة الله وبركاته
أبيات رد على مبدع القاف
بيض الله وجهه وسلم فكره
أمل أن ترقا لذائقتكم
جاني كتاب فيه يا ناس ذارب=مابه سلام إسلام مذهب أجانيب
مرسول للأستاذ من عند عارب=وأول ردودا العلم يلقا تراحيب
مدري صحيح العلم والا موارب=لا تقرب الشبهة ولا تقرب الريب
ومن لا يحسب للزمن لو هارب=ياقع ليا صكت عليه المشاعيب
كان اللحا ما تحتمي للشوارب=هذي تراها من كبار العذاريب
ليا كان شدك ما وصل للغوارب=لا تنطح سباع قوية مخاليب
ترا الثعالي والأًسد ما تقارب=حتى ولو كانت تجر الأقانيب
وترا الأقارب سدها مثل مارب=ما تكشف الخلة ولا تبدي العيب
ومن لا يجود بالخصوم المضارب=تاقع بجنبه ضاريات المعاطيب
ليا صارت أفكارك سواة المسارب=خلك فطين وشوف وين المواجيب
إحذر تـدور بالبحـر صيد خارب=ما كل بحـار يضـوي مكاسيـب
لا يعلق بسنارتك قرش سارب=كم قانص يرهي على الصيد ويخيب
يالله عسى ذاالرد ماهو بكارب=يا مرسل القيفان بليا مناديب
هذا جوابي عد لن كنت شارب=إنهل قبل يغزيك في عارضك شيب