السلام عليكم ورحمة الله وبركاته ..
كل عام وانتم بخير ومبروك عليكم الشهر ..
هذه الابيات المتواضعه تجاوبا مع الشاعر / ابن هليل
واعتذر عن التأخر في الرد نظرا لضروفي ..
اليكم الابيات على عجل :
البروق تلوح والمضمي يخايل
والقلوب اسرارها مثل الودايع !!
ياسلام الله على قوم الفعايل
الرجال اللي على العليا ولايع !!
وياسلام الله على سيوفن صقايل
بالملاقا حقها ماهوب ضايع !!
لانتخن فيهم طويلات الجدايل
ياردون الموت .. حزات الوقايع !!
العتيبي لانتخيته جاك صايل
فزعته سنع رجل ماله سنايع !!
والعتيبي لونخاه اللي بحايل
جاه لو هو من ورى حد الشرايع !!
اصلكم معروف اصايل من اصايل
ومن يشكك خبل والا انسان ضايع !!
وطيبكم معروف مايبغى دلايل
شفته بعيني .. وذاعته المذايع !!
قاله اللي من رجال عيال وايل
الرجال اللي لياضاقت وسايع !!
سادة الدنيا وعدلة كل مايل
عندها بيع العمر بيع البضايع !!
والسلام ورحمة الله يالصمايل
للكبار وللصغار وللرضايع !!
وسلامتكم