اليكم الأبيات
كالعادة بدون مقدمات
البيت لا منه تمايل عموده=يطيح لا هبه من الجو نسناس
والجسم لا منه تراخت عضوده=ما عاد به شيء يوقي عن الراس
والرجل تعرف حكمته من ردوده=و رجل بليا عرف من ماش ينحاس
وليا لقيت الرجل كاثر صدوده=هذا دليل إنه مجافا من الناس
واللي يكثر بالقرابة لهوده=لا حدته غبر الليالي بينداس
واللي يخالف بالعوائد جدوده=ما ينفعه لو كان من طيب الساس
ومن لا يوفي بالمواقف عهوده=أنا أشهد إنه نجس وأفعاله نجاس
ترى الفتى رجولته في وعوده=ومن لا يصون الوعد يبشر بالافلاس
ليا صار ما تعرف بنقصه و زوده=يحيرك في ضرب الأخماس بسداس
والعد لا من شح قلت وروده=يغور ماه وتنطوي عنه الأمراس
واللي يقدم شيء من نفس جوده=لا بد ياتي يوم يشرب من الكاس
كل زارع(ن)لابد يجني حصوده=الخير يجلب خير والشر عفاس
قالوه بالأمثال من طيب عوده=والبوم يخر بوم ما يجيب قرناس