نوم العوافي روح لا تكثر اللوم=تصبح وتمسي ياهوى البال في خير
ماني بنائم خاطري صار مكلوم=من كثر ما قدمت لي من معاذير
ليا كان في بالي هواجيس وعلوم=النوم يا سيد الغنادير بيطير
بساهر الأفكار وأساهر نجوم=أبني وأهد الليل يجلب تفاكير
بسهر ليال طوال لو دائم الدوم=ما عاد لي حيله ولا لي تدابير
بودع أحلام أمس وأستورد حلوم=يمكن تكون أحسن وتطلع مسافير
بكتب على الأوراق وأقلب البوم=القا بعض ذكراك بين التصاوير
أذكر بها هموم وتفرج هموم=والصبح تلقا لو بعض التفاسير
ما دامني من شوفتك صرت محروم=ما عاد تفرق باقيات المحاذير
حتى غديت من االقهر شبه مسموم=كل ما تقفي فكرة جاتني غير
صار الخطا والصح ماهو بمفهوم=لكنها بالبال مثل الطوابير
هذي نصدرها وهذيك بقدوم=ليال ياما بين وارد وتصدير
ودي تكن ظالم ولا تكون مظلوم=وأنا لظلمك عاد بشوف تبرير
وليا عجزت أبرره قلت مقسوم=هذا مقدر واحد من المقادير
خل السهر لعيون ما حولها نوم=أرقد وتصبح ياهوى البال في خير