حل الشتا لكن في داخلي صيف=أنفاس روحي يوم تذري سمايم
عواصف(ن)بالقلب ترجفه ترجيف=واظنها تبقى مع العمر دايم
كله من اللي نشف الريق تنشيف=اللي على شانه رمينا العمايم
طبيت في بحره بليا مجاديف=والي شهور أنا مع الموج عايم
مهو على كيفي ولاني على الكيف=مد وجزر ما بيننا ما تلايم
حريف في جزره وبالمد حريف=يلعب بنا لعب الودع والتمايم
اليا قربته حط ما بيننا سيف(1)=لكن أحبه وأعشقه فيه هايم
خيالها بالفكر مثل الخطاطيف=مشغول به فكري ولو كنت نايم
وانا ادري إنه فيه لوعات ويهيف=لكن وده يظهر النا عزايم
يصدق بحال وباقي اللعب تخريف=تفطر بماش وباقي العمر صايم
وده ولا وده كثير التصانيف=محتار ما بين العدل والظلايم
يعشمك بالورد ويقدم الليف=وليا رضي ناولك زمرة قسايم
خلط قساه بلين ولفه توليف=عواصفه هوجا بعدها نسايم
محتار في وصفه بكل التواصيف=ماني بداري نصر والا هزايم
لو كان صرنا بالليالي مواليف=ما كان شمت وصاحبي بعد شايم
تدرون عاد السالفة كلها كيف؟=محد(ن)خبر صقر(ن)تعشق حمايم
لأجل كذا تخاف لتروح تنتيف=تغدي وليمة من لذيذ الولايم
تحذرت طارت ولا بعدها شيف=والصقر في جوه يجوب الخرايم
بابيات شعر(ن)بين عطف وتعطيف=مهو بجايب من وراها غنايم
حتى ولو إنه تنقا المحاريف=الناس بالأذواق ماهم توايم
الشعر للي يفهمه فيه تهديف=أما خطا والا معاني صرايم
الغًم لا تقربه ينسفك تنسيف=تبقى عيالك من بعدكم يتايم
تلقى لبيب وباقي الخلق ياحيف=والشرح موجز لا تطول القوايم
البحر ما ينقصه نسف المغاريف=والشعر كله هرج قاعد وقايم
(1)المسافة