مساجله بين الشاعر مبارك طناء الشمري والشاعر/ فوزان
 

بسم الله الرحمن الرحيم

مساجله شعريه بين الشاعر/ فوزان مقبل التبيناوي والشاعر/ مبارك طناء مبيريك الشمري

همي اللي كل ماولى يجي = ياهمز قامت ضلوعي تزهمه

مايباعد خابرن له منهجي = بين قلبي والضلوع ا لمبهمه

عاملن له بالضماير مدرجي = كل ما إرتاحت يمر ويلطمه

يانديمي هات حبرن يمزجي = بالورق حاول تخط وترسمه

كالوشم من فوق خد العسوجي = زينه ربه وزين مبسمه

فكري اللي شد خيله وأسرجي = من معاني ماتبيله ترجمه

حافظه عن كل شي ٍ يسمجي = خلصه من كل زيف ونظمه

وآضحه مثل النهار الأبلجي = وخافيه ماكل رجل ٍ يفهمه

وآرثه من راس عود ٍ ينتجي = مايجيب إلا بيوتن محكمه

ياإلهي وأنت غوث المرتجي = يوم أخذته راجين إنك ترحمه

بعد ذلك هات عون المحوجي = من وكيله صانعه مارهمه

جاء من اليابان حي المنتجي = وقفه في جمركه ماسلمه

منوّة اللي خابرن له مخرجي = من ورى الحدين زيته كيّمه

ياضرب خطو الطريق الأعوجي = ضو شعالن بليله مضلمه

يشبه لشيهان بحرن أهوجي = قرنسه ربه وفعله علمه

ياتقفى صيدته ماتنهجي = كل ماحاشت كفوفه حطمه

أو كما الحر الجليل الأفحجي = ملك شيخ ٍ مايحسب درهمه

ذاخره يالاح برقه وألعجي = برق وسم ٍ في ثناياء المرزمه

باغيّه يازان نبت العرفجي = في إدعوث ٍ بالروايح طمطمه

في نقرها للحبارى مدرجي = ماسرح به راعين هو وغنمه

إرتفع عنها وصك وعرجي = إختلط ريش الحبارى ولحمه

ذي وصوف الجيب كله تبهجي = لونه أوضح والجنوب موسمه

كاملن ماهو زمالت عربجي = التوانك والأسبير مدعمه

من تملك طارته ماحرجي = ياصل الحروّه بوقت الملزمه

وإن مسك له خط سهلن لجلجي = راعيه ياقل عزمه يجحمه

فوقه غلام(ن) عزيز المسجي = مايخاوي كل عفن وشرذمه

خذ مني مرسول عجل ونهجي = لبو عبدالله وحالا ً علمه

يامبارك وأنت عون الملتجي = ويش رآيك بالهنوف المكرمه

له عيونن واسعات ودعجي = والبلاء كل البلاء ياسلهمه

إن هرج كله دلع وتغنجي = وإن ضحك طب الجروح وبلسمه

يا مشاء تقول ثوبه فججي = ردفها يبي يفارق محزمه

وسطها شبرن يجي أو مايجي = والشعر غطاء الكتوف وهندمه

مثلها بين العرب مادوجي = النهد قض الملابس وعدمه

مشكلتها يالسنافي تسهجي = ماتكلم واحدن لو كلمه

هقوتك هذا غرور مرججي = أو ثقه بالنفس يالله سلمه

مارباء بين تربه وأعيوجي = ولانقل حبل الحطب في معصمه

ولاعرف خب الرضم والأصلجي = ولابناء بيت الشعر بأم رضمه

ولو يشوفه بصرين مايرتجي = طرد زينات الملاثم حرمه

ندري إنك باالمثل ماتفلجي = شاعرن ماشال بوكه وقلمه

يامبارك سالفتها تحرجي = مشكله ياخوك ماهي مسلمه

ردا على الشاعر / فوزان التبيناوي

الرجاء بك يامعين المرتجي = جل شأنك ياعظيم المرحمه

طالبك تقبل صلاتي وحججي = يارجاء كل ا لعباد المحرمه

رحمتك مادمت حي ومعرجي = نجني من هول يوم المشئمه

ياإله الكون سهل مخرجي = من عذاب القبر واللي تعلمه

ساعتن فيها العمل يستنتجي = ويسأل إبنادم عن اللي قدمه

بعد ذكرك يامعين الملتجي = هاضني جزل البيوت القيّمه

برمجي من دم قلبي برمجي = ياخوافي روحي المتألمه

وإفتحي باب الغرام وبرهجي = كل باب(ن) للقوب المغرمه

وإفرجي بعض الهموم وفرجي = كل قاسي قلب وقت الملحمه

يابو مشعل ياشريف المنهجي = لك مكانه وسط قلبي مكرمه

نفس يوم إتخرجك وإتخرجي = والتخصص والعطاء والأوسمه

شي واضح ماهو دوبه ينهجي = وأنت دكتور القصيد ومنجمه

يابو مشعل لو تشوف إتلولجي = عفت نومي والعباد منومه

دام قلبك بالمحبه محرجي = آصل الحروّه بوقت المعظمه

ياشعيله حل وقتك وأدلجي = ياذلولي عجلي بالدرهمه

ناحري درب القصاد ودفلجي = ماحلاء ممشاء الأصايل بجهمه

دوهجي يالصيعريه دوهجي = عن عطالك والعفاش مبيّمه

ناحري نجم الشمال ولجلجي = كن عينك جمر نار ٍ مضرمه

صيعريه بنت عرب المسجي = راعيه طول السفر ماينهمه

كن سرحان الخلاء له يدلجي = تقل ينهش بالفخوذ المبرمه

حس هملولن تقفاه إبردي = من هماليل المزون المرهمه

فوقه اللي مثل شغل الفركجي = والسفايف والقصيره بشحمه

والألماني جرمنّي المنتجي = حشو بطنه والمشوط ومحزمه

شمري(ن) ماقضى الليل إدوجي = ولا عرض رايه على كل إزلمه

ولا يبي شوف الشرط والقهوجي = سبع برن كل قفرن يكهمه

يابو مشعل ياشريف المنسجي = الرجل بأمرين علمه وعدمه

جيت كلي جبت حيلي وحججي = لأجل توثيق العهود المبرمه

يوم واجهت الجميل العسوجي = حظ يافوزان منهو محرمه

هقوتي من راح يمّه مايجي = فيه لون البرتقاله وطعمه

عندلن ماشيف حول المكوجي = ولا فرش فرشه على ربق إبهمه

ولا رباء بين الصداوي وأم لجي = ولا تصَبح بالوجيه المجهمه

ولاتعلم للغطاوي والحجي = ولا دخل بيت الحموله وهدمه

ولا تعوّد للسفر والسفرجي = ولا يعرف المكيَجَه والمرهمه

كان دينه مايعارض منهجي = إن هداه الله لشرع المحكمه

يانخيتوني من أول من يجي = وكل من يزحم جنابك نزحمه

مسندي فوزان ياحل إلججي = وبدل الضحكه بهرج التمتمه

مايداني هرج ناسن سذجي = ولا وخذله حق غدر وجلغمه

يابعد منهو عوايده الهجي = نسل عودن مايحب الهذرمه

يامشاء في قالتن مايفلجي = سم ساعه للقلوب المجرمه

وكلنا من صلب عون الملتجي = وإبن عمك منك طيبه وكرمه

أنا لك ياحل يومن مزعجي = وأنت لي عند الأمور المعظمه

الشاعر/ مبارك طناء مبيريك الشريهي الشمري

مبارك الشريهي...


بارك الله فيك


سعدت بتصفح ما دونت بصفحتك


وإن دل على شيء فإنما يدل على ذوقك


سلمت يداك وفكرك


بنتظار مزيدا من الإبداع والتألق


لا تحرمنا جديدك


لك خالص الود والتحية

رد: مساجله بين الشاعر مبارك طناء الشمري والشاعر/ ف
 

الله يسلمك



مشكور على النقل المميز


صحت السنة من قال ونقل



لك خالص التحية

رد: مساجله بين الشاعر مبارك طناء الشمري والشاعر/ ف
 

مبارك الشريهي

كل الشكر مقدم لك لموضوعك الجميل المميز

لــــــــك تـــحــــــيـــــاااااااتــــــي

صقر عتيبة

رد: مساجله بين الشاعر مبارك طناء الشمري والشاعر/ ف