جربت الأيام ماضيها وحاضرها=عرفت فيها مرار وشفت حاليها
لو زانت أيام غداره مخاطرها=مخلوطة(ن)رخصها مع جنب غاليها
مر(ن)تسايرك ومرار(ن)تسايرها=لكنها ما تجامل من يواليها
ومن ضمن ما شفت فيها وأتذكرها=شجرة بليس اللعينة قطع تاليها
أخذت لي عمر وأحرق في سجايرها=لا ريح طيب وروحي صرت باليها
كنت أحسبني زعيم(ن)يوم أعمرها=كل المخابي معبيها وماليها
حتى غدا وجهي أسمر من مأثرها=كرهت نومي وزادي صرت ساليها
بعد عرفت الضرر قررت أدمرها=ملعونة يا عسى الله لا يخليها
يا شارب التبغ عجل قوم كسرها=الحق على النفس قبل الضر يخليها
قدام صحتك تغدي من جرايرها=لا تشعل النار في صدرك وتصليها
تحرق فؤادك ومالك وأنت خابرها=التهلكة جوز عنها لا تكاليها
ثبت ضررها عسى الله لا يكثرها=لكن شيطانها بالخبث طاليها
ملعونة(ن)واللعن يلحق لتاجرها=واللي يروج لها واللي يعليها
هذي نصيحة وأنا ماني بذاخرها=لا تصير في يوم واحد من مواليها

بارك الله فيك.....سعدت بردك الطيب الحياة دروس نتعلم فيها الضار والنافع


وعلينا أن نعلم غيرنا ما تعلمنا لعلهم ينتفعون به


لك خالص تحيتي