ما بين يوم وليل منك تغيرت=جئيتك وأنا في حال واليوم في حال
تدفعني الأشواق وأعلنت مسررت=شرحت لك ذاتي وأنا كلي أمال
تقرأ صحائف سيرتي بعد قررت=تكون معشوقي بحل(ن)وترحال
حتى غموضي لأجل عينيك فسرت=غربلت لك سيرة حياتي بغربال
على بساطك كل ما فات حضرت=من شان لو ساورك تشكيك ينزال
وباللحظة اللي كنت ملهوف دمرت=كل الحلوم اللي لها القلب ميال
ساعة بلا تبرير مني تعذرت=ما كني الا هزني عنف زلزال
ذبحتني من داخلي بعد فجرت=أعذارك اللي كنها فوقي جبال
كل الورود اللي جمعت لك بعثرت=غدت نهايب بين رجلي وخيال
حيرتني وأنا الذي ما تحيرت=صارت سوا في ناظري يمين وشمال
توهت فكري فيك مهما تفكرت=القا حقيقة فيك ماهي على البال
ليا لنت لك لحظة عليه تكبرت=وليا بعدت القاك مع روحي ظلال
وليا دنيت أبعدت عني وكدرت=الخاطر اللي جاك من غير مرسال
أخلفت وعدك كم مرة و مررت=على أمل في يوم تقرب وتنطال
أسلمت لك لكن فوقي تنصرت=خليتني للهم واليأس شيال
ما عاد بقوى صبر مهما تصبرت=الصبر قل جروحي عراض و طوال
بعد الرجا يا صاحبي منك عذرت=كثر الكلام تسد من دونه أفعال
كنت المنى لكن بعدك تخيرت=طريق عني مختلف روح بالحال
بحمل بقايا الروح من بعد مدبرت=وأقضي بقايا العمر بالأرض رحال
هذا قراري بعد تمحيص صدرت=عليك تنفيذه بلا شرح وجدال
أسرتني وقت(ن)طويل وتحررت=ما دامني رجال بعيش رجال
وإن كان جالك فرصة(ن)يوم سيرت=والله ما جازيك في سوء الأعمال