الله من قلب(ن)غدا دمه يفوح=ولاني بداري ويش يا قلب ناوي
نهبه مني سالب لفكر والروح=شكله يماني كان ما كنت غاوي
لمعة جبينه كنها بارق يلوح=والا مثل بدر(ن)تعلا سماوي
أرسل على قلبي من العين ذابوح=مقدر على صده ولاني بقاوي
والله مدري وين من حبه اروح=وقعت في حبه وطحت متساوي
هذا نصيبي لو ماشي مصلوح=غرتني أوهامي وكثر الهقاوي
في غيبته أبني من احلامي صروح=وفي شوفته كني عليل متشاوي
حتى غدا حالي مثل قارع اللوح=وأنا الذي من فضل ربي غناوي
قبل غرامه كنت زيزوم طحطوح=وبعد غرامه صرت هلكان ثاوي
لو قلت له ارفق بحالي يامملوح=قلب عليه موجعات الشكاوي
ليا ذرف دمعه عل الخد مسفوح=صارت عليه من كبار الرزاوي
إن كان مجروحه فأنا بعد مجروح=جرح(ن)بقلبي مالقا له مداوي
بس أتصبر وأقطع النوح بالنوح=مكتوب لي في دنيتي الشقاوي
لكن يا سيد الرعابيب مسموح=افعل بحالي ما تشا كان هاوي(1)
اطعن بقلبي لين تبدي لك قروح=ما دامته يهواك حذراك تاوي
اطعن برمحك لين تلقاه مطروح=من بعدها ذبه بفج خلاوي
ما دامني مذبوح يازين مذبوح=خلاص أنا جيتك على الكف هاوي(2)
كل الذي تفعله بالقلب ممدوح=ماني بلا شاكي ولاني بعاوي
والك العهد ياكامل الزين مبوح=مشكي غرامك لو فيه البلاوي